శంషాబాద్ విమానాశ్రయంలో నకిలీ విమాన టికెట్లు.. ముగ్గురు ప్రయాణికులు అదుపులోకి

శంషాబాద్‌: హైదరాబాద్‌లోని రాజీవ్‌ గాంధీ అంతర్జాతీయ విమానాశ్రయంలో నకిలీ విమాన టికెట్ల వ్యవహారం వెలుగులోకి వచ్చింది. దుబాయ్‌ వెళ్లేందుకు వచ్చిన ముగ్గురు ప్రయాణికుల వద్ద నకిలీ టికెట్లను అధికారులు గుర్తించినట్లు సమాచారం.

టికెట్ల విషయంలో ఏజెంట్‌ తమను మోసం చేశాడని ప్రయాణికులు ఆరోపించినట్లు తెలుస్తోంది. ఈ ఘటనకు సంబంధించి ముగ్గురు ప్రయాణికులను అదుపులోకి తీసుకున్న పోలీసులు విచారిస్తున్నారు. ప్రయాణికులకు టికెట్లు అందించిన ఏజెంట్‌ పరారీలో ఉన్నట్లు సమాచారం. అతడి కోసం పోలీసులు గాలింపు చర్యలు చేపట్టారు.

ఈ వ్యవహారంలో నకిలీ టికెట్లు ఎలా తయారయ్యాయి, ప్రయాణికులకు ఏజెంట్‌ ఏ విధంగా టికెట్లు అందించాడు అనే అంశాలపై దర్యాప్తు కొనసాగుతోంది. పోలీసుల విచారణ పూర్తయిన తర్వాత మరిన్ని వివరాలు వెల్లడయ్యే అవకాశం ఉంది.