మల్లప్ప సెల గుడి రహదారి నిర్మాణానికి శంకుస్థాపన

హనుమంతునిపాడు: మండలంలోని నందనవనంలో ఉన్న మల్లప్ప సెల గుడికి రహదారి నిర్మాణ పనులకు ఆదివారం శంకుస్థాపన చేశారు. మండల టీడీపీ అధ్యక్షుడు సానుకొమ్ము తిరుపతిరెడ్డి ఆధ్వర్యంలో మాజీ జడ్పీటీసీ పల్లాల నారపరెడ్డి ఈ కార్యక్రమాన్ని నిర్వహించారు.

ఈ సందర్భంగా మల్లప్ప సెల గుడికి వెళ్లే మార్గంలో సుమారు రూ.20 లక్షల వ్యయంతో గ్రావెల్ రహదారిని నిర్మించనున్నట్లు నిర్వాహకులు తెలిపారు. రహదారి నిర్మాణంతో ఆలయానికి వచ్చే భక్తులు, స్థానిక ప్రజలకు రాకపోకలు సులభతరం అవుతాయని పేర్కొన్నారు.

రహదారి నిర్మాణ పనులను త్వరితగతిన పూర్తి చేసి ప్రజలకు అందుబాటులోకి తీసుకురావాలని స్థానికులు కోరారు.

ఈ కార్యక్రమంలో క్లస్టర్ ఇన్‌చార్జి గాయం తిరుపతి రెడ్డి, గ్రామ టీడీపీ నాయకులు, కార్యకర్తలు పాల్గొన్నారు.