గన్నవరంలో క్రికెట్ మ్యాచ్‌లో ఘర్షణ.. బ్యాట్లతో దాడి, యువకుడి పరిస్థితి విషమం

కృష్ణా జిల్లా గన్నవరం బాయ్స్ హైస్కూల్ మైదానంలో జరుగుతున్న క్రికెట్ మ్యాచ్ సందర్భంగా బ్యాటింగ్ వివాదం హింసాత్మక ఘర్షణకు దారితీసింది.

మ్యాచ్ సమయంలో లక్షల్లో పందాలు కాసినట్లు సమాచారం. బ్యాటింగ్ విషయంలో రెండు జట్ల యువకుల మధ్య మాటామాటా పెరగడంతో గొడవ చెలరేగింది. ఆగ్రహానికి లోనైన యువకులు క్రికెట్ బ్యాట్లతో ఒకరిపై ఒకరు దాడి చేసుకున్నారు.

ఈ ఘటనలో ఓ యువకుడి తలకు తీవ్ర గాయమై పరిస్థితి విషమంగా మారింది. స్థానికులు వెంటనే 108 అంబులెన్స్ ద్వారా విజయవాడ ప్రభుత్వ ఆసుపత్రికి తరలించి చికిత్స అందిస్తున్నారు.

సమాచారం అందుకున్న గన్నవరం పోలీసులు ఘటనాస్థలానికి చేరుకుని దాడికి పాల్పడిన పలువురు యువకులను అదుపులోకి తీసుకుని పోలీస్ స్టేషన్‌కు తరలించారు. ఘటనపై కేసు నమోదు చేసి దర్యాప్తు చేపట్టారు.