శాయంపేటలో పారిశుద్ధ్య పనులను పరిశీలించిన GWMC కమిషనర్

• చెత్త సేకరణ తీరుపై స్థానిక ప్రజలను అడిగి తెలుసుకున్న టి. వెంకన్న

వరంగల్, అక్టోబర్ 30 (ఎన్ టుడే న్యూస్):

గ్రేటర్ వరంగల్ మున్సిపల్ కార్పొరేషన్ (GWMC) పరిధిలోని శాయంపేటలో పారిశుద్ధ్య పనులను కమిషనర్ టి. వెంకన్న క్షేత్రస్థాయిలో పరిశీలించారు. స్వచ్ఛ ఆటో ద్వారా ప్రతిరోజూ ఇంటింటికీ చెత్త సేకరిస్తున్న తీరును స్థానిక ప్రజలను అడిగి తెలుసుకున్నారు.

ఈ సందర్భంగా పారిశుద్ధ్య కార్మికులకు పలు సూచనలు చేశారు. ప్రజలకు పరిశుభ్రమైన వాతావరణం కల్పించేలా పారిశుద్ధ్య నిర్వహణను సమర్థవంతంగా చేపట్టాలని ఆదేశించారు.

పారిశుద్ధ్యంపై నిరంతర పర్యవేక్షణ

చెత్త సేకరణలో నిర్లక్ష్యం లేకుండా చూడాలని, పారిశుద్ధ్య పనులు క్రమం తప్పకుండా నిర్వహించాలని అధికారులకు సూచించారు. పారిశుద్ధ్య నిర్వహణపై అధికారులు నిరంతరం పర్యవేక్షణ కొనసాగించాలని కమిషనర్ స్పష్టం చేశారు.

ప్రజారోగ్యాన్ని దృష్టిలో ఉంచుకుని పరిసరాలను పరిశుభ్రంగా ఉంచేందుకు సిబ్బంది సమన్వయంతో పనిచేయాలని సూచించారు.