పెద్దకాపర్తి బీసీ హాస్టల్లో హ్యాపీనెస్ కోర్స్ ప్రారంభం
యోగ, ధ్యానంతో విద్యార్థుల్లో ఏకాగ్రత, ఆత్మవిశ్వాసం పెంపు
చిట్యాల రూరల్, సెప్టెంబర్ 28:
ది ఆర్ట్ ఆఫ్ లివింగ్ ఆధ్వర్యంలో చిట్యాల మండలం పెద్దకాపర్తి గ్రామంలోని బీసీ హాస్టల్లో విద్యార్థులకు హ్యాపీనెస్ కోర్స్లో భాగంగా యోగ, ధ్యాన కార్యక్రమాలను సోమవారం ప్రారంభించారు.
ఈ కార్యక్రమాన్ని సర్పంచుల ఫోరం మండల అధ్యక్షుడు, పెద్దకాపర్తి గ్రామ సర్పంచ్ కాటం వెంకటేశం ప్రారంభించారు. విద్యార్థుల్లో శారీరక, మానసిక సామర్థ్యాలను పెంపొందించడంతో పాటు ఏకాగ్రత, ఆత్మవిశ్వాసం, సానుకూల ఆలోచనా విధానాన్ని అభివృద్ధి చేయడమే కార్యక్రమం ఉద్దేశమని నిర్వాహకులు తెలిపారు.
కార్యక్రమంలో భాగంగా విద్యార్థులకు యోగ, ధ్యానం, పద్మ సాధనలు, త్రీ స్టేజ్ ప్రాణాయామం, సూర్య నమస్కారాలు, భస్త్రిక తదితర సాధనలను నిర్వహించారు.
ఈ సందర్భంగా ది ఆర్ట్ ఆఫ్ లివింగ్ నల్గొండ జిల్లా కోఆర్డినేటర్, టీచర్ పల్లపు బుద్ధుడు మాట్లాడుతూ ప్రతిరోజూ యోగ, ధ్యానం చేయడం ద్వారా విద్యార్థుల్లో ఏకాగ్రత, ఆత్మవిశ్వాసం, ఆత్మస్థైర్యం పెంపొందించుకోవచ్చని తెలిపారు. ధ్యానం మానవ జీవితంలో ముఖ్యమైన సాధన అని, విద్యార్థులు తమ నిత్యజీవితంలో యోగ, ధ్యానాన్ని భాగం చేసుకోవాలని సూచించారు.
గురుదేవ్ శ్రీశ్రీ రవిశంకర్ సూచించిన సుదర్శన్ క్రియ ద్వారా అంతర్గత శక్తిని గుర్తించడంతో పాటు మానసిక ప్రశాంతతను పొందేందుకు అవకాశం ఉంటుందని పల్లపు బుద్ధుడు పేర్కొన్నారు. ప్రతిరోజూ కనీసం పది నిమిషాలు ధ్యానం చేయడం ద్వారా మనశ్శాంతి, సానుకూల ఆలోచనలు పెంపొందించుకోవచ్చని తెలిపారు. శాంతియుత సమాజం, వసుధైవ కుటుంబం కోసం ప్రతి ఒక్కరూ ధ్యానాన్ని అలవర్చుకోవాలని పిలుపునిచ్చారు.
ఈ కార్యక్రమంలో హాస్టల్ వార్డెన్ ధర్మపురి తార, ట్యూటర్ బాలు, విద్యార్థులు పాల్గొన్నారు.
