దురుసు ప్రవర్తనపై పోలీసుల వివరాలు ఇవ్వండి డీజీపీకి హైకోర్టు ఆదేశాలు

మహిళా ఎమ్మెల్యేలతో దురుసు ప్రవర్తనపై పోలీసుల వివరాలు ఇవ్వండి డీజీపీకి హైకోర్టు ఆదేశాలు

హైదరాబాద్‌, సెప్టెంబరు 29: మహిళా ఎమ్మెల్యేలతో దురుసుగా ప్రవర్తించిన పోలీసులను గుర్తించి, వారి వివరాలను తగిన చర్యల కోసం శాసనసభ స్పీకర్‌ ఎదుట ఉంచాలని డీజీపీని తెలంగాణ హైకోర్టు ఆదేశించింది.

ఇటీవల జరిగిన అసెంబ్లీ సమావేశాల తొలిరోజు బీఆర్‌ఎస్‌ ఎమ్మెల్యేలు, పోలీసుల మధ్య ఉద్రిక్త పరిస్థితులు నెలకొన్నాయి. అసెంబ్లీలోకి వెళ్లకుండా పోలీసులు అడ్డుకోవడంతోపాటు తమతో దురుసుగా ప్రవర్తించారని ఆరోపిస్తూ బీఆర్‌ఎస్‌ఎల్పీ హైకోర్టును ఆశ్రయించింది. ఈ పిటిషన్‌పై విచారణ సందర్భంగా దురుసుగా ప్రవర్తించిన పోలీసులను గుర్తించి చర్యలు తీసుకోవాలని డీజీపీకి హైకోర్టు ఆదేశాలు జారీ చేసింది.

అయితే ఈ ఆదేశాలను సవరించాలని కోరుతూ ప్రభుత్వం హైకోర్టులో అప్లికేషన్‌ దాఖలు చేసింది. పోలీసులు స్పీకర్‌ ఆదేశాలను అమలు చేశారని, వారిపై చర్యలు తీసుకుంటే పోలీసుల నైతిక స్థైర్యం దెబ్బతినే అవకాశం ఉందని ప్రభుత్వం తన వాదనలు వినిపించింది.

ఈ అప్లికేషన్‌పై జస్టిస్‌ మాధవీదేవి ధర్మాసనం విచారణ చేపట్టింది. అసెంబ్లీ ప్రాంగణం లోపల నిబంధనల ఉల్లంఘన జరిగితే చర్యలు తీసుకునే అధికారం స్పీకర్‌కు ఉంటుందని స్పష్టం చేసింది. మహిళా ఎమ్మెల్యేల పట్ల దురుసుగా ప్రవర్తించిన పోలీసులను గుర్తించి, వారి వివరాలను తగిన చర్యల కోసం స్పీకర్‌ ఎదుట ఉంచాలని డీజీపీని ఆదేశించింది.

అసెంబ్లీ వెలుపల, ముఖ్యంగా అసెంబ్లీలోకి ప్రవేశించే మార్గం వద్ద ఘటన జరిగి ఉంటే.. ఆ ఘటనకు సంబంధించి పోలీసులు తీసుకున్న చర్యల వివరాలను హైకోర్టు ఎదుట సమర్పించాలని డీజీపీకి ధర్మాసనం సూచించింది.