భారత్ ఫ్యూచర్ సిటీలో గ్లోబల్ సమ్మిట్ ఏర్పాట్ల పరిశీలన

విద్యుత్ సరఫరా, మౌలిక సదుపాయాలపై సమీక్షించిన TGSPDCL సీఎండీ జితేష్ వి. పాటిల్ 

భారత్ ఫ్యూచర్ సిటీ: మీకాన్‌పేటలోని భారత్ ఫ్యూచర్ సిటీలో డిసెంబర్ 7 నుంచి 9 వరకు నిర్వహించనున్న తెలంగాణ గ్లోబల్ సమ్మిట్-2026 ఏర్పాట్లు వేగంగా కొనసాగుతున్నాయి. ఈ నేపథ్యంలో సమ్మిట్ నిర్వహణకు సంబంధించి చేపడుతున్న పనుల పురోగతిని TGSPDCL సీఎండీ జితేష్ వి. పాటిల్ పరిశీలించారు. భారత్ ఫ్యూచర్ సిటీలో ఏర్పాటు చేస్తున్న స్కిల్ యూనివర్సిటీతో పాటు గ్లోబల్ సమ్మిట్‌కు సంబంధించిన వివిధ ఏర్పాట్లను ఆయన క్షేత్రస్థాయిలో సమీక్షించారు.

అనంతరం తెలంగాణ ప్రభుత్వ ప్రధాన కార్యదర్శి సంజయ్ జాజు అధ్యక్షతన నిర్వహించిన సమీక్షా సమావేశంలో జితేష్ వి. పాటిల్ పాల్గొన్నారు. ఈ సందర్భంగా సమ్మిట్ నిర్వహణకు అవసరమైన విద్యుత్ సరఫరా, విద్యుత్ మౌలిక సదుపాయాలు, ఇతర అనుబంధ ఏర్పాట్లపై వివరించారు.

గ్లోబల్ సమ్మిట్ జరిగే మూడు రోజుల పాటు విద్యుత్ సరఫరాలో ఎలాంటి అంతరాయం కలగకుండా అవసరమైన ముందస్తు చర్యలు చేపట్టడంపై సమావేశంలో చర్చించారు. నాణ్యమైన, నిరంతర విద్యుత్ సరఫరా అందించేందుకు అవసరమైన ఏర్పాట్లు, మౌలిక సదుపాయాల కల్పనపై సమీక్షించారు. సమ్మిట్ నిర్వహణకు విద్యుత్ శాఖ తరఫున అవసరమైన సహకారం అందించేందుకు చేపట్టాల్సిన చర్యలపై అధికారులు చర్చించినట్లు సమాచారం.