రసగుల్లా అని చెప్పి పేలుడు పదార్థం ఇచ్చిన స్నేహితుడు.. నోట్లో పెట్టుకోగానే వ్యక్తి మృతి

మధ్యప్రదేశ్‌లోని దిండోరి జిల్లాలో ఘటన.. నిందితుడిని అదుపులోకి తీసుకున్న పోలీసులు

మధ్యప్రదేశ్: స్నేహితుడిని ఆటపట్టించాలనే ఉద్దేశంతో రసగుల్లా అని చెప్పి పేలుడు పదార్థాన్ని అందించిన ఘటన విషాదానికి దారితీసింది. ఆ పదార్థాన్ని స్వీటుగా భావించి నోట్లో పెట్టుకుని కొరకడంతో ఒక్కసారిగా పేలుడు సంభవించి ఓ వ్యక్తి ప్రాణాలు కోల్పోయాడు. మధ్యప్రదేశ్‌లోని దిండోరి జిల్లా పదరియా ఛాంటా గ్రామంలో ఈ ఘటన వెలుగులోకి వచ్చింది.

వివరాల ప్రకారం.. గ్రామానికి చెందిన రాజేంద్ర బరౌతియా కుటుంబ సభ్యులతో కలిసి రాత్రి భోజనం చేసిన అనంతరం సుమారు 8 గంటల సమయంలో ఇంటి వరండాలో కూర్చున్నాడు. కొద్దిసేపటి తర్వాత అతని స్నేహితుడు రామభగత్ అక్కడికి వచ్చాడు. ఇద్దరూ కలిసి కాసేపు మాట్లాడుకుంటూ ఉన్నారు. ఈ క్రమంలో రామభగత్ రసగుల్లా అని చెబుతూ రాజేంద్రకు ఒక వస్తువును అందించాడు.

అది స్వీటేనని భావించిన రాజేంద్ర ఎలాంటి అనుమానం లేకుండా నోట్లో పెట్టుకుని కొరికాడు. అయితే అది రసగుల్లా కాకుండా 'పిగ్-కిల్లర్ బాంబ్' కావడంతో నోట్లోనే ఒక్కసారిగా పేలిపోయింది. ఈ పేలుడు ధాటికి రాజేంద్ర నోటికి తీవ్ర గాయాలయ్యాయి. ఊహించని ఘటనతో అక్కడున్న కుటుంబ సభ్యులు తీవ్ర ఆందోళనకు గురయ్యారు.

వెంటనే కుటుంబ సభ్యులు రాజేంద్రను చికిత్స నిమిత్తం ఆసుపత్రికి తరలించారు. అయితే అప్పటికే అతను మృతి చెందినట్లు వైద్యులు నిర్ధారించారు. దీంతో కుటుంబంలో విషాదం నెలకొంది.

సమాచారం అందుకున్న పోలీసులు ఘటనపై విచారణ చేపట్టారు. రాజేంద్రకు పేలుడు పదార్థాన్ని అందించిన రామభగత్‌ను అదుపులోకి తీసుకుని కేసు నమోదు చేశారు. ఈ ఘటనకు సంబంధించిన పూర్తి కారణాలు, పేలుడు పదార్థం ఎలా అందుబాటులోకి వచ్చింది, ఘటన వెనుక ఉన్న ఉద్దేశం వంటి అంశాలపై పోలీసులు దర్యాప్తు కొనసాగిస్తున్నారు.