రాష్ట్రస్థాయి బాస్కెట్‌బాల్ పోటీలకు కేసముద్రం విద్యార్థి అక్షయ్ కుమార్ ఎంపిక

70వ ఎస్‌జీఎఫ్ అండర్‌-17 పోటీల్లో ప్రాతినిధ్యం.. జిల్లా స్థాయి పోటీల్లో ప్రతిభతో రాష్ట్రస్థాయికి అర్హత

కేసముద్రం: 70వ స్కూల్ గేమ్స్ ఫెడరేషన్ (ఎస్‌జీఎఫ్) అండర్‌-17 రాష్ట్రస్థాయి బాస్కెట్‌బాల్ పోటీలకు మహబూబాబాద్ జిల్లా కేసముద్రం స్టేషన్‌లోని పీఎం శ్రీ జెడ్పీహెచ్‌ఎస్ విద్యార్థి అక్షయ్ కుమార్ ఎంపికయ్యాడు. ఈ నెల 13 నుంచి 15వ తేదీ వరకు కరీంనగర్ జిల్లాలో నిర్వహించనున్న రాష్ట్రస్థాయి పోటీల్లో అక్షయ్ కుమార్ పాల్గొననున్నాడు. ఈ విషయాన్ని పాఠశాల ప్రధానోపాధ్యాయుడు, ఫిజికల్ డైరెక్టర్ డాక్టర్ కొమ్ము రాజేందర్ వెల్లడించారు.

గత నెలలో నిర్వహించిన మహబూబాబాద్ జిల్లా స్థాయి బాస్కెట్‌బాల్ పోటీల్లో అక్షయ్ కుమార్ అత్యుత్తమ ప్రతిభ కనబరిచాడు. ఆటలో నైపుణ్యం, ప్రతిభను ప్రదర్శించడంతో రాష్ట్రస్థాయి పోటీలకు ఎంపికయ్యాడు. గతంలోనూ జిల్లా స్థాయిలో జరిగిన వివిధ క్రీడా పోటీల్లో పాల్గొని పలు బహుమతులు సాధించినట్లు పాఠశాల ప్రతినిధులు తెలిపారు.

రాష్ట్రస్థాయి పోటీలకు ఎంపిక కావడం పట్ల పాఠశాల ప్రధానోపాధ్యాయుడు, ఉపాధ్యాయులు, సీనియర్ క్రీడాకారులు హర్షం వ్యక్తం చేశారు. అక్షయ్ కుమార్‌ను అభినందించి, రాష్ట్రస్థాయి పోటీల్లోనూ ప్రతిభ కనబరిచి పాఠశాలకు, జిల్లాకు మంచి పేరు తీసుకురావాలని ఆకాంక్షించారు.