పరకాలలో తల్లీకుమార్తెపై కత్తితో దాడి.. కుమార్తె మృతి

పరకాల: పట్టణంలోని ఆకులవాడలో తల్లీకుమార్తెపై గుర్తుతెలియని వ్యక్తులు కత్తితో దాడి చేసిన ఘటన కలకలం రేపింది. ఈ ఘటనలో కుమార్తె సుగుణమ్మ (63) మృతి చెందగా, తల్లి లచ్చమ్మ తీవ్రంగా గాయపడ్డారు.

గురువారం ఉదయం ఇంటి తలుపులు తెరవకపోవడంతో లచ్చమ్మ కుమారుడు వీరస్వామి ఇంటికి వెళ్లి చూడగా తల్లీకుమార్తె గాయాలతో కనిపించారు. వెంటనే వారిని ఆస్పత్రికి తరలించగా, సుగుణమ్మ అప్పటికే మృతి చెందినట్లు వైద్యులు నిర్ధారించారు. తీవ్రంగా గాయపడిన లచ్చమ్మను మెరుగైన చికిత్స కోసం వరంగల్ ఎంజీఎం ఆస్పత్రికి తరలించారు.

సమాచారం అందుకున్న పోలీసులు ఘటనాస్థలానికి చేరుకుని పరిశీలించారు. ఏసీపీ సతీశ్‌బాబు, సీఐ ప్రవీణ్‌కుమార్ ఘటనాస్థలాన్ని పరిశీలించి వివరాలు సేకరించారు.

దాడికి కారణం ఏమిటి? ఘటనకు పాల్పడిన వ్యక్తులు ఎవరు? అనే కోణాల్లో పోలీసులు దర్యాప్తు చేస్తున్నారు. ఘటనకు సంబంధించిన పూర్తి వివరాలు పోలీసుల దర్యాప్తులో వెల్లడికావాల్సి ఉంది.