ఖమ్మంలో శ్రీవేంకటేశ్వర ఆలయ నిర్మాణానికి అంకురార్పణ

ఈ నెల 12న భూమిపూజ.. చిన్న జీయర్ స్వామిని ఆహ్వానించిన మంత్రి తుమ్మల నాగేశ్వర రావు 

ఖమ్మం నగర ఆధ్యాత్మిక చరిత్రలో మరో కీలక ఘట్టానికి రంగం సిద్ధమైంది. తిరుమల తిరుపతి దేవస్థానం ఆధ్వర్యంలో ఖమ్మంలో ప్రతిష్టాత్మకంగా నిర్మించనున్న శ్రీ వేంకటేశ్వర స్వామివారి ఆలయ నిర్మాణానికి ఈ నెల 12న అంకురార్పణ జరగనుంది.

ఆలయ నిర్మాణ భూమిపూజ కార్యక్రమానికి హాజరై ఆశీస్సులు అందించాల్సిందిగా రాష్ట్ర వ్యవసాయ శాఖ మంత్రి తుమ్మల నాగేశ్వరరావు శ్రీశ్రీశ్రీ చిన్న జీయర్ స్వామిని స్వయంగా కలిసి ఆహ్వానించారు. ఈ సందర్భంగా మంత్రి వెంట కాంగ్రెస్ పార్టీ రాష్ట్ర నాయకులు డాక్టర్ తుమ్మల యుగంధర్ పాల్గొన్నారు.

ఖమ్మం గడ్డపై కలియుగ దైవం శ్రీ వేంకటేశ్వర స్వామివారి ఆలయ నిర్మాణానికి భూమిపూజ జరగడం భక్తుల చిరకాల వాంఛను నెరవేర్చే ఘట్టమని మంత్రి తుమ్మల నాగేశ్వరరావు పేర్కొన్నారు. ఈ పవిత్ర కార్యక్రమాన్ని నగర ప్రజలంతా భక్తిశ్రద్ధలతో, అంగరంగ వైభవంగా నిర్వహించాలని ఆయన పిలుపునిచ్చారు.