వరద ముంపు ప్రాంతాల్లో ఎమ్మెల్యే రోషన్ కుమార్ పర్యటన

 శివపురంలో వరద బాధితులకు పరామర్శ.. సహాయక శిబిరాన్ని సందర్శించి భరోసా చింతలపూడి, నవంబర్ 5: గత రెండు రోజులుగా కురుస్తున్న భారీ వర్షాలకు తమ్మిలేరు వరద ఉధృతి పెరగడంతో ఏలూరు జిల్లా చింతలపూడి నియోజకవర్గంలోని శివపురం గ్రామం వరద ముంపునకు గురైంది. ఈ నేపథ్యంలో చింతలపూడి ఎమ్మెల్యే సొంగా రోషన్ కుమార్ గురువారం వరద ప్రభావిత ప్రాంతంలో పర్యటించి బాధితులకు అండగా నిలిచారు. వరద ఉధృతికి నేలకూలిన ఇళ్లను, నీట మునిగిన ప్రాంతాలను స్వయంగా పరిశీలించి నష్టపోయిన కుటుంబాల పరిస్థితిని అడిగి తెలుసుకున్నారు. అనంతరం తుఫాన్ సహాయక శిబిరాన్ని సందర్శించి అక్కడ ఆశ్రయం పొందుతున్న వరద బాధితులను పరామర్శించారు. ప్రభుత్వం ద్వారా అందుతున్న సహాయక చర్యలు, ఆహారం, వసతి తదితర సౌకర్యాల గురించి ఆరా తీశారు. ఈ సందర్భంగా ఎమ్మెల్యే మాట్లాడుతూ వరద బాధితులకు ప్రభుత్వం అన్ని విధాలా అండగా ఉంటుందని, బాధితులకు అవసరమైన సహాయాన్ని అందించేందుకు చర్యలు తీసుకుంటామని భరోసా ఇచ్చారు. ప్రజలు ఎవరూ ఆందోళన చెందాల్సిన అవసరం లేదని, ప్రతి ఒక్కరినీ ఆదుకునేందుకు ప్రభుత్వం సిద్ధంగా ఉందని తెలిపారు. వరద పరిస్థితులపై అధికారులు నిరంతరం అప్రమత్తంగా ఉండాలని, ముంపు ప్రాంతాల్లో ప్రజలకు ఎలాంటి ఇబ్బందులు కలగకుండా సహాయక, పునరావాస కార్యక్రమాలను సమర్థవంతంగా నిర్వహించాలని ఆదేశించారు. వరద ప్రభావిత ప్రాంతాల్లో పరిస్థితిని ఎప్పటికప్పుడు పర్యవేక్షిస్తూ బాధితులకు తక్షణ సహాయం అందించాలని అధికారులకు సూచించారు.