చిరుధాన్యాలతో పోషకాహారం.. తల్లులకు అవగాహన

మేడికొండూరు: మండలంలోని విశదల అంగన్‌వాడీ కేంద్రంలో ‘పోషణ మాహం’ కార్యక్రమంలో భాగంగా తల్లులతో చిరుధాన్యాల వంటకాల ప్రదర్శన నిర్వహించారు. చిరుధాన్యాలతో తయారు చేసిన వివిధ రకాల వంటకాలను ప్రదర్శించారు.

ఈ సందర్భంగా అంగన్‌వాడీ సూపర్‌వైజర్ వై. రాజ్యలక్ష్మి మాట్లాడుతూ పిల్లలకు జంక్‌ఫుడ్‌కు బదులుగా ఇంట్లోనే చిరుధాన్యాలతో పోషక విలువలు కలిగిన స్నాక్స్‌ తయారు చేసి ఇవ్వాలని సూచించారు. చిన్నారుల ఆరోగ్యానికి సమతుల్య ఆహారం ఎంతో అవసరమని తెలిపారు.

ఐదేళ్లలోపు పిల్లల ఎత్తు, బరువులను ప్రతి నెలా నమోదు చేయించాలని తల్లులకు సూచించారు. పిల్లల ఎదుగుదలను క్రమం తప్పకుండా పర్యవేక్షిస్తూ, పోషకాహారంపై తల్లులు ప్రత్యేక శ్రద్ధ చూపాలని కోరారు.

కార్యక్రమంలో అంగన్‌వాడీ కార్యకర్త వెంకటరత్నం, తల్లులు పాల్గొన్నారు.