అయోధ్యలో వైభవంగా పదో దీపోత్సవం.. 30 లక్షలకు పైగా దీపాలతో సరికొత్త రికార్డు లక్ష్యం!

ఉత్తరప్రదేశ్‌లోని పవిత్ర పుణ్యక్షేత్రం అయోధ్యలో పదో దీపోత్సవాన్ని అత్యంత వైభవంగా నిర్వహించేందుకు ఏర్పాట్లు ముమ్మరంగా సాగుతున్నాయి. సరయూ నదీ తీరంలోని 56 ఘాట్లను లక్షలాది దీపాల వెలుగులతో దేదీప్యమానంగా తీర్చిదిద్దేందుకు నిర్వాహకులు సిద్ధమవుతున్నారు. ఈసారి ఏకంగా 30 లక్షలకు పైగా మట్టి దీపాలను వెలిగించి సరికొత్త రికార్డు సృష్టించాలని లక్ష్యంగా పెట్టుకున్నారు. ఇందుకోసం నగరమంతా విద్యుద్దీపాల అలంకరణలు, ప్రత్యేక ఏర్పాట్లతో సుందరంగా ముస్తాబు చేస్తున్నారు. నవంబర్ 5 నుంచి 8వ తేదీ వరకు నాలుగు రోజుల పాటు దీపోత్సవ వేడుకలు జరగనున్నాయి. గత ఏడాది 26 లక్షల దీపాలను వెలిగించగా, ఈసారి అంతకుమించి దీపాలను వెలిగించేందుకు ప్రణాళికలు రూపొందించారు. లక్షలాది దీపాల కాంతులతో సరయూ నదీ తీరంలో ఆధ్యాత్మిక శోభ వెల్లివిరియనుంది.