దీపావళి స్వీట్‌ ధర వింటే షాకవ్వాల్సిందే.. కిలో రూ.1.11 లక్షలు!
24 క్యారెట్ల తినదగిన బంగారం, వెండి భస్మంతో తయారీ.. ఒక్క స్వర్ణ మిఠాయి ధర రూ.1,111
జైపూర్, నవంబర్ 05 (ఎన్ టుడే న్యూస్): దీపావళి పండుగ వేళ స్వీట్ల ధరలు అందరినీ ఆశ్చర్యానికి గురిచేస్తున్నాయి. రాజస్థాన్‌ రాజధాని జైపూర్‌లోని 'త్యోహార్‌' స్వీట్‌ షాప్‌ ప్రత్యేకంగా తయారు చేస్తున్న మిఠాయి కిలో ధర ఏకంగా రూ.1.11 లక్షలుగా ఉంది. ఈ ధర విన్నవారు ఆశ్చర్యపోతున్నారు.
బంగారం, వెండితో ప్రత్యేక తయారీ
ఈ ఖరీదైన స్వీట్లను 24 క్యారెట్ల తినదగిన బంగారం, వెండి భస్మం, కుంకుమపువ్వు, అత్యంత ఖరీదైన చిల్గోజా పప్పులతో తయారు చేస్తున్నట్లు సమాచారం. ప్రత్యేక పదార్థాలు, విలాసవంతమైన తయారీ విధానం కారణంగా వీటికి భారీ ధర నిర్ణయించినట్లు తెలుస్తోంది.
ఒక్క మిఠాయి ధర రూ.1,111
ఈ స్వీట్‌ షాప్‌లో ఒక్కో స్వర్ణ మిఠాయి ధర రూ.1,111గా ఉండటం విశేషం. దీపావళి సందర్భంగా ప్రత్యేకమైన స్వీట్లను కొనుగోలు చేయాలనుకునే వారికి ఈ మిఠాయి ఆకర్షణగా నిలుస్తోంది. సాధారణ స్వీట్ల ధరలతో పోలిస్తే ఇది అత్యంత ఖరీదైన మిఠాయిగా చర్చనీయాంశమైంది.
