పోలీస్‌ స్టేషన్‌లోనే మహిళపై అత్యాచారం.. 15 మంది పోలీసులు సస్పెండ్
భర్తతో గొడవపడి రక్షణ కోసం వచ్చిన మహిళపై వైర్లెస్ ఆపరేటర్‌ అఘాయిత్యం చేసినట్లు ఆరోపణలు.. ముగ్గురి అరెస్ట్‌
జార్ఖండ్, నవంబర్ 05 (ఎన్ టుడే న్యూస్): మహిళలకు రక్షణ కల్పించాల్సిన పోలీస్‌ స్టేషన్‌లోనే ఓ దారుణ ఘటన వెలుగులోకి వచ్చింది. జార్ఖండ్ రాష్ట్రంలోని సరాయికేలా ఖర్సావన్‌ జిల్లాలో గమ్హరియా పోలీస్‌ స్టేషన్‌లో ఓ మహిళపై అత్యాచారం జరిగినట్లు ఆరోపణలు రావడం కలకలం రేపింది. ఈ ఘటనపై పోలీసు ఉన్నతాధికారులు చర్యలు చేపట్టి 15 మంది పోలీసులను సస్పెండ్ చేశారు.
రక్షణ కోసం పోలీస్‌ స్టేషన్‌కు వెళ్లిన మహిళ
భర్తతో గొడవ పడిన ఓ మహిళ రక్షణ కోరుతూ ఫిర్యాదు చేసేందుకు గమ్హరియా పోలీస్‌ స్టేషన్‌కు వెళ్లింది. అక్కడ విధుల్లో ఉన్న పోలీసులు ఆమెకు విశ్రాంతి తీసుకునేందుకు ఒక గదిని కేటాయించినట్లు సమాచారం. అయితే, అదే గదిలో వైర్లెస్ ఆపరేటర్‌గా పనిచేస్తున్న నీరజ్‌ లక్రా ఆమెపై అత్యాచారానికి పాల్పడినట్లు ఆరోపణలు వచ్చాయి.
15 మంది పోలీసులపై సస్పెన్షన్‌ వేటు
ఈ ఘటన వెలుగులోకి రావడంతో పోలీసు ఉన్నతాధికారులు విచారణ చేపట్టారు. విధి నిర్వహణలో నిర్లక్ష్యంగా వ్యవహరించడం, బాధితురాలికి రక్షణ కల్పించడంలో విఫలమయ్యారనే ఆరోపణలపై 15 మంది పోలీసులను సస్పెండ్ చేసినట్లు సమాచారం.
ముగ్గురి అరెస్ట్‌.. జ్యుడీషియల్‌ కస్టడీకి ప్రధాన నిందితుడు
మహిళపై అత్యాచారానికి పాల్పడినట్లు ఆరోపణలు ఎదుర్కొంటున్న వైర్లెస్ ఆపరేటర్‌ నీరజ్‌ లక్రాను పోలీసులు అరెస్ట్‌ చేశారు. కోర్టు ఆదేశాల మేరకు అతడిని జ్యుడీషియల్‌ కస్టడీకి తరలించారు. ఈ కేసులో సబ్‌ ఇన్‌స్పెక్టర్‌ మనోజ్‌ కుమార్‌ సాహు, కానిస్టేబుల్‌ సంతోష్‌ కుమార్‌ రాయ్‌లను కూడా అధికారులు అరెస్ట్‌ చేసినట్లు సమాచారం.
