పెళ్లికి ముందే శిక్షణ.. వైవాహిక జీవితానికి ప్రత్యేక కోర్సు

వివాహ బంధం బలంగా ఉండాలంటే అవగాహన తప్పనిసరి.. 

15 రోజుల పాటు సర్టిఫికెట్ కోర్సు భాగస్వామి ఎంపిక నుంచి కుటుంబ బాధ్యతల వరకు ప్రత్యేక శిక్షణ పెళ్లి చేసుకోవడానికి ఎన్నో ఏర్పాట్లు చేసుకుంటున్న నేటి యువత.. పెళ్లి తర్వాత జీవితాన్ని ఎలా సంతోషంగా కొనసాగించాలనే విషయంపై కూడా అవగాహన పెంచుకోవాల్సిన అవసరం ఉందని భావించిన గోవా కాలేజ్ ఆఫ్ హోమ్ సైన్స్ వినూత్న కార్యక్రమానికి శ్రీకారం చుట్టింది. వివాహ బంధాలను మరింత బలోపేతం చేయడంతో పాటు ఆరోగ్యకరమైన, సుదీర్ఘమైన కుటుంబ జీవితానికి యువతను సిద్ధం చేయాలనే లక్ష్యంతో 'మ్యారేజ్ రెడీనెస్: ప్రిపేరింగ్ ఫర్ హెల్తీ అండ్ లాస్టింగ్ రిలేషన్షిప్స్' పేరుతో ప్రత్యేక సర్టిఫికెట్ కోర్సును ప్రారంభించింది. కాలేజీలోని హ్యూమన్ డెవలప్‌మెంట్ అండ్ ఫ్యామిలీ స్టడీస్ విభాగం ఆధ్వర్యంలో ఈ కోర్సును డిసెంబర్ 2 నుంచి 17 వరకు 15 రోజుల పాటు నిర్వహించనున్నారు. డిగ్రీ, పీజీ విద్యార్థులతో పాటు పెళ్లికాని యువతీయువకులు, కుటుంబ సంబంధాలు, వైవాహిక జీవితం గురించి తెలుసుకోవాలనే ఆసక్తి ఉన్నవారు కూడా ఇందులో చేరేందుకు అవకాశం కల్పించారు. ఈ కోర్సులో కేవలం వివాహానికి సంబంధించిన సంప్రదాయాలు, ఆచారాల గురించి కాకుండా పెళ్లి తర్వాత ఇద్దరు వ్యక్తులు కలిసి జీవితాన్ని ఎలా ముందుకు తీసుకెళ్లాలనే అంశాలపై ప్రత్యేకంగా అవగాహన కల్పించనున్నారు. ముందుగా వ్యక్తిగత స్వభావం, విలువలు, భావోద్వేగాలను అర్థం చేసుకోవడం, వాటిని నియంత్రించుకోవడం వంటి అంశాలపై శిక్షణ ఇస్తారు. డేటింగ్ వెనుక ఉన్న ఉద్దేశం, ఎదుటి వ్యక్తి మనస్తత్వాన్ని అర్థం చేసుకోవడం, జీవిత భాగస్వామిని ఎంపిక చేసుకునే సమయంలో పరిశీలించాల్సిన అంశాలను వివరిస్తారు. అలాగే స్త్రీ, పురుష స్వభావాలు, వాటి ప్రభావం పరస్పర సంబంధాలపై ఎలా ఉంటుందనే విషయాలను కూడా చర్చించనున్నారు. వైవాహిక జీవితంలో ఎదురయ్యే అభిప్రాయ భేదాలు, చిన్నచిన్న గొడవలు, కుటుంబ బాధ్యతలు, భావోద్వేగపరమైన సమస్యలను పరస్పర అవగాహనతో ఎలా పరిష్కరించుకోవాలనే అంశాలపై ప్రత్యేక శిక్షణ ఇవ్వనున్నారు. ఒకరినొకరు గౌరవించుకోవడం, బాధ్యతలను పంచుకోవడం, సమస్యల సమయంలో సంయమనంతో వ్యవహరించడం వంటి విషయాలను నేర్పించడమే ఈ కోర్సు ప్రధాన ఉద్దేశం. మంచి ఉద్యోగం, ఉన్నతమైన కెరీర్ కోసం యువత దాదాపు రెండు దశాబ్దాల పాటు చదువుకుంటున్నప్పటికీ, జీవితాంతం కొనసాగాల్సిన వివాహ బంధం, కుటుంబ జీవితం కోసం ప్రత్యేకంగా సిద్ధమయ్యే అవకాశాలు తక్కువగా ఉన్నాయని కాలేజీ బ్రోచర్‌లో పేర్కొన్నట్లు సమాచారం. ఇటీవల కాలంలో వివాహ వివాదాలు, విడాకుల కేసులు పెరుగుతున్న నేపథ్యంలో ఇలాంటి అవగాహన కార్యక్రమాల అవసరం ఉందనే అభిప్రాయం వ్యక్తమవుతోంది. గోవా రాష్ట్ర చట్టాల శాఖ గణాంకాల ప్రకారం 2022 నుంచి 2025 మధ్య రాష్ట్రంలోని సివిల్ కోర్టుల్లో 3,000కు పైగా వివాహ, విడాకుల పిటిషన్లు దాఖలైనట్లు పేర్కొంటున్నారు. ఈ పరిస్థితిని దృష్టిలో ఉంచుకుని యువతలో వివాహ బంధాలపై అవగాహన పెంచేందుకు రాష్ట్రవ్యాప్తంగా ప్రీ మ్యారేజ్ కౌన్సెలింగ్ కేంద్రాలను ఏర్పాటు చేయాలనే ఆలోచనను ముఖ్యమంత్రి ప్రమోద్ సావంత్ ప్రకటించారు. ఈ నేపథ్యంలో కాలేజీ చేపట్టిన మ్యారేజ్ రెడీనెస్ కోర్సు ప్రాధాన్యత సంతరించుకుంది. పెళ్లి వేడుకను ఘనంగా నిర్వహించుకోవడంతో పాటు ఆ తర్వాతి జీవితాన్ని కూడా పరస్పర ప్రేమ, నమ్మకం, గౌరవం, బాధ్యతలతో కొనసాగించేందుకు యువతను సిద్ధం చేయడంలో ఈ తరహా కార్యక్రమాలు ఉపయోగపడతాయని భావిస్తున్నారు.