ఎండపల్లిలో వైకాపా వర్గాల మధ్య ఘర్షణ.. ఐరన్ రాడ్‌తో యువకుడిపై దాడి

మల్లేశ్వరం యువకుడికి తీవ్ర గాయాలు.. రక్తస్రావంతో ఆసుపత్రికి తరలింపు

గ్రామంలో పోలీసుల మోహరింపు.. ఉద్రిక్త వాతావరణం ఏలూరు జిల్లా చింతలపూడి మండలం ఎండపల్లి గ్రామంలో వైఎస్సార్ కాంగ్రెస్ పార్టీలోని ఇరు వర్గాల మధ్య ఘర్షణ చోటుచేసుకుంది. ఈ క్రమంలో ఇరు వర్గాల మధ్య మాటామాటా పెరిగి వివాదం తీవ్ర రూపం దాల్చినట్లు సమాచారం. ఘర్షణలో భాగంగా మల్లేశ్వరం గ్రామానికి చెందిన ఓ యువకుడిపై మరో వర్గానికి చెందిన వైకాపా కార్యకర్త ఐరన్ రాడ్‌తో దాడి చేసినట్లు తెలుస్తోంది. ఈ దాడిలో యువకుడికి తీవ్ర గాయాలై భారీగా రక్తస్రావం జరిగినట్లు సమాచారం. ఘటనతో ఒక్కసారిగా గ్రామంలో కలకలం రేగింది. సమాచారం అందుకున్న పోలీసులు వెంటనే ఎండపల్లి గ్రామానికి చేరుకుని పరిస్థితిని అదుపులోకి తీసుకొచ్చేందుకు చర్యలు చేపట్టారు. ఎలాంటి అవాంఛనీయ ఘటనలు చోటుచేసుకోకుండా గ్రామంలో పోలీసులను మోహరించారు. ఘర్షణకు గల కారణాలు, దాడికి సంబంధించిన పూర్తి వివరాలు తెలియాల్సి ఉంది.