అంగరంగ శ్రీ శారదా పీఠ పాలిత శ్రీ వేంకటేశ్వర స్వామివారి 31వ బ్రహ్మోత్సవ వేడుకలు

ఆరు రోజుల పాటు భక్తిశ్రద్ధలతో ప్రత్యేక పూజలు, హోమాలు, వాహన సేవలు.. గరుడ వాహన సేవ, స్వర్ణ రథోత్సవానికి పోటెత్తిన భక్తజనం

నవంబర్ 6 (ఎన్ టుడే న్యూస్): శ్రీ శారదా పీఠ పాలిత శ్రీ వేంకటేశ్వర స్వామివారి 31వ బ్రహ్మోత్సవ వేడుకలు నవంబర్ 1 నుంచి 6వ తేదీ వరకు అత్యంత వైభవంగా నిర్వహించారు. ఆరు రోజుల పాటు ప్రత్యేక అలంకరణలు, పూజలు, హోమాలు, కల్యాణోత్సవాలు, వివిధ వాహన సేవలతో ఆలయ ప్రాంగణం భక్తి పారవశ్యంతో కళకళలాడింది. భక్తులు పెద్ద సంఖ్యలో పాల్గొని స్వామివారిని దర్శించుకున్నారు.

ఈ బ్రహ్మోత్సవాలు విశాఖ శ్రీ శారదా పీఠాధిపతులు శ్రీశ్రీశ్రీ స్వరూపానందేంద్ర స్వామివారు, ఉత్తర పీఠాధిపతులు శ్రీశ్రీశ్రీ స్వాత్మానందేంద్ర మహాసరస్వతి మహాస్వామివారి దివ్య ఆశీస్సులతో నిర్వహించారు.

తొలిరోజు విశ్వక్సేన పూజ, ధ్వజారోహణ

నవంబర్ 1న విశ్వక్సేన పూజ, శేష వాహన సేవ, పుణ్యాహవచనం, దీక్షాధారణ, ఆకల్మష హోమం తదితర కార్యక్రమాలు నిర్వహించారు. అనంతరం హారతి, తీర్థప్రసాదాలు, అన్నప్రసాద వితరణ చేపట్టారు. ధ్వజారోహణ కార్యక్రమం భక్తిశ్రద్ధలతో జరిగింది. చందానగర్‌కు చెందిన శ్రీమతి డి. నాగమణి అన్నప్రసాద వితరణకు సహకరించారు.

స్వామివారి కల్యాణోత్సవం.. హనుమద్వాహన సేవ

నవంబర్ 2న స్వామివారి కల్యాణోత్సవాన్ని ఘనంగా నిర్వహించారు. అనంతరం హారతి, తీర్థప్రసాదాల పంపిణీతో పాటు అన్నప్రసాద వితరణ చేపట్టారు. శ్రీమతి, శ్రీ టి. సుభాష్ దంపతులు అన్నప్రసాద వితరణకు సహకరించారు. సాయంత్రం హనుమద్వాహన సేవ నిర్వహించగా, స్వామివారు ఆలయ తిరుమాడ వీధుల్లో ఊరేగారు. ఈ సేవ భక్తులను విశేషంగా ఆకట్టుకుంది.

కలశాభిషేకం, సామూహిక లక్ష కుంకుమార్చన

నవంబర్ 3న అష్టోత్తర శత కలశాభిషేకం, సామూహిక లక్ష కుంకుమార్చన నిర్వహించారు. అనంతరం తీర్థప్రసాదాల పంపిణీ, అన్నప్రసాద వితరణ చేపట్టారు. శ్రీమతి, శ్రీ బాలకృష్ణ నాయుడు దంపతులు అన్నప్రసాద వితరణకు సహకరించారు. సాయంత్రం స్వామివారి సింహవాహన సేవ వైభవంగా జరిగింది.

మహా సుదర్శన హోమం, గరుడ వాహన సేవ

నవంబర్ 4న మహా సుదర్శన హోమం నిర్వహించారు. అనంతరం తీర్థప్రసాదాల పంపిణీ, అన్నప్రసాద వితరణ చేపట్టారు. శ్రీమతి, శ్రీ కె. సత్యనారాయణ రాజు దంపతులు అన్నప్రసాద వితరణకు సహకరించారు. సాయంత్రం సహస్ర దీపాలంకరణ సేవ, గరుడ వాహన సేవ తదితర కార్యక్రమాలు భక్తుల సమక్షంలో వైభవంగా నిర్వహించారు.

మహాశాంతి హోమం, పూర్ణాహుతి, స్వర్ణ రథోత్సవం

నవంబర్ 5న నిత్యోపాసన, మహాశాంతి హోమం, పూర్ణాహుతి, చక్రస్నానం, ధ్వజావరోహణ తదితర కార్యక్రమాలు నిర్వహించారు. అనంతరం తీర్థప్రసాదాల పంపిణీతో పాటు బాలకృష్ణ నాయుడు దంపతుల ఆధ్వర్యంలో అన్నప్రసాద వితరణ చేపట్టారు.

తదనంతరం స్వామివారి కోసం ప్రత్యేకంగా తయారు చేయించిన స్వర్ణ రథంపై ఆలయ తిరుమాడ వీధుల్లో ఊరేగింపు నిర్వహించారు. స్వర్ణ రథోత్సవాన్ని తిలకించేందుకు పెద్ద సంఖ్యలో భక్తులు తరలివచ్చారు. గరుడ వాహన సేవ, స్వర్ణ రథ సేవలు భక్తుల ఆనందోత్సాహాల మధ్య జరిగాయి.

ఆలయ కమిటీ ఆధ్వర్యంలో విస్తృత ఏర్పాట్లు

ఆలయ ప్రధానార్చకులు శ్రీ సత్యసాయి సుదర్శనం నేతృత్వంలో బ్రహ్మోత్సవ కార్యక్రమాలు నిర్వహించారు. పాలకమండలి సభ్యులు కె. రఘుపతి రెడ్డి, సుబ్బారాయుడు, పి. అశోక్ గౌడ్, టి. సుభాష్, ఎన్. అశోక్ కుమార్, కె. దేవేందర్ రెడ్డి, సిహెచ్. విఎస్. రాంగోపాల్, బి. శ్రీకాంత్, కె. వెంకట శేషయ్య, ఎస్. నాగేశ్వరరావు, బ్రహ్మయ్య గుప్తా తదితరులు కార్యక్రమాలను పర్యవేక్షించారు.

భక్తులకు ఎలాంటి అసౌకర్యాలు కలగకుండా ఆలయ కమిటీ ఆధ్వర్యంలో తీర్థప్రసాదాలు, అన్నప్రసాదాల పంపిణీకి ప్రత్యేక ఏర్పాట్లు చేశారు. బ్రహ్మోత్సవాల విజయానికి సహకరించిన పుష్పాలంకరణ భక్తులు, పట్టు వస్త్రాలు సమకూర్చిన దాతలు, వాహన సేవలు నిర్వహించిన భక్తులు, స్వామివారి స్వర్ణ రథ నిర్మాణానికి విరాళాలు అందించిన దాతలు, వివిధ సేవల్లో సహాయ సహకారాలు అందించిన వారిని ఈ సందర్భంగా సత్కరించారు.

ఆరు రోజుల పాటు దీక్షా పట్టు వస్త్రాలు సమర్పించిన దాత బాలకృష్ణ నాయుడును భక్తులు ప్రత్యేకంగా అభినందించారు.

భజనలు, నృత్య ప్రదర్శనలతో ఆధ్యాత్మిక సందడి

బ్రహ్మోత్సవాల సందర్భంగా స్వామివారు వివిధ వాహనాలపై ఆలయ తిరుమాడ వీధుల్లో ఊరేగిన సమయంలో భక్తులు భజనలు, వివిధ నృత్య ప్రదర్శనలు, సాంస్కృతిక కార్యక్రమాలు నిర్వహించారు. తమ భక్తిని చాటుకుంటూ స్వామివారి సేవలో పాల్గొన్నారు.

భక్తుల విశేష భాగస్వామ్యం, దాతల సహకారం, ఆలయ కమిటీ సమన్వయంతో శ్రీ శారదా పీఠ పాలిత శ్రీ వేంకటేశ్వర స్వామివారి 31వ బ్రహ్మోత్సవ వేడుకలు వైభవంగా జరిగాయి.