వీఆర్ఏల సమస్యలు పరిష్కరించాలని మంత్రికి వినతి

ఆత్రేయపురం: తమ సమస్యలను పరిష్కరించాలని కోరుతూ వీఆర్ఏలు శనివారం పర్యాటక, సాంస్కృతిక, సినిమాటోగ్రఫీ శాఖ మంత్రి కందుల దుర్గేష్‌కు నిడదవోలులోని ఆయన స్వగృహం వద్ద వినతిపత్రం అందజేశారు. ఈ సందర్భంగా తమ సమస్యలను మంత్రికి వివరించారు.

వీఆర్ఏల సమస్యలపై మంత్రి సానుకూలంగా స్పందించినట్లు వీఆర్ఏల సంఘం మండల అధ్యక్షుడు లోవ రాజు తెలిపారు. ఈ నెల 7న జరిగే క్యాబినెట్ సమావేశంలో వీఆర్ఏల సమస్యలను ప్రస్తావిస్తానని, ఉప ముఖ్యమంత్రి పవన్ కల్యాణ్ దృష్టికి కూడా తీసుకెళ్తానని మంత్రి హామీ ఇచ్చినట్లు ఆయన పేర్కొన్నారు.

అనంతరం ఆత్రేయపురం తహశీల్దార్ కార్యాలయం వద్ద ప్రభుత్వ వైఖరికి నిరసనగా వీఆర్ఏలు చెవిలో పువ్వులు పెట్టుకుని నిరసన తెలిపారు. తమ సమస్యలను ప్రభుత్వం వెంటనే పరిష్కరించాలని వారు డిమాండ్ చేశారు.