మారుతినగర్లో అధ్వాన్నంగా రోడ్లు.. బురదమయంగా మారిన కాలనీ
మారుతినగర్లో అధ్వాన్నంగా రోడ్లు.. బురదమయంగా మారిన కాలనీ దోమల బెడదతో అవస్థలు పడుతున్న కాలనీ వాసులు
చింతలపూడి నియోజకవర్గ రిపోర్టర్ కుడిపుడి సత్తి బాబు
ఏలూరు జిల్లా: చింతలపూడి నగర పంచాయతీ పరిధిలోని మారుతినగర్ కాలనీలో రోడ్లు అధ్వాన్నంగా మారాయి. ఇటీవల కురుస్తున్న వర్షాలకు కాలనీలోని రహదారులన్నీ బురదమయంగా మారడంతో పాటు పలుచోట్ల వర్షపు నీరు నిలిచిపోయి చెరువులను తలపిస్తున్నాయి.
రోడ్లపై నీరు నిలిచిపోవడంతో దోమల బెడద కూడా తీవ్రంగా పెరిగిందని స్థానికులు చెబుతున్నారు. దోమల కారణంగా అనారోగ్య సమస్యలు ఎదుర్కొంటున్నామని వాపోతున్నారు. కాలనీలోని రహదారులు పూర్తిగా దెబ్బతినడంతో కనీసం నడిచేందుకు కూడా ఇబ్బందికర పరిస్థితులు నెలకొన్నాయని స్థానికులు ఆవేదన వ్యక్తం చేస్తున్నారు.
మారుతినగర్లో రోడ్ల అభివృద్ధితో పాటు వర్షపు నీరు నిలిచిపోకుండా శాశ్వత డ్రైనేజీ వ్యవస్థను ఏర్పాటు చేయాలని కాలనీ వాసులు కోరుతున్నారు. నగర పంచాయతీ అభివృద్ధికి మంజూరైన నిధులను వినియోగించి సమస్యకు శాశ్వత పరిష్కారం చూపాలని డిమాండ్ చేస్తున్నారు.
నగర పంచాయతీ అభివృద్ధి అధికారులు, పట్టణ ప్రణాళిక అధికారులు మారుతినగర్ను క్షేత్రస్థాయిలో పరిశీలించి, రోడ్ల అభివృద్ధి, పారిశుద్ధ్య చర్యలు, డ్రైనేజీ వ్యవస్థ ఏర్పాటుపై తక్షణ చర్యలు తీసుకోవాలని స్థానికులు కోరుతున్నారు.
