టీచర్ నియామకాలపై ఆరు కోర్టు ధిక్కరణ కేసులు

హైకోర్టు ముందు యోగితా రాణా ఆన్‌లైన్‌ హాజరు

19 మంది అభ్యర్థులను అర్హులుగా గుర్తించిన DEOలు.. వారి సిఫార్సులను ప్రభుత్వం ఎందుకు పరిగణనలోకి తీసుకోలేదని ప్రశ్నించిన డివిజన్‌ బెంచ్‌

హైదరాబాద్, నవంబర్ 05 (ఎన్ టుడే న్యూస్): తెలంగాణలో టీచర్‌ నియామకాలకు సంబంధించిన ఆరు కోర్టు ధిక్కరణ కేసుల్లో విద్యాశాఖ ప్రిన్సిపల్‌ సెక్రటరీ, ఐఏఎస్‌ అధికారి డాక్టర్‌ యోగితా రాణా హైకోర్టు ముందు ఆన్‌లైన్‌ ద్వారా హాజరయ్యారు. ఈ కేసుల విచారణ సందర్భంగా అభ్యర్థుల అర్హతలు, జిల్లా విద్యాశాఖ అధికారుల (DEO) సిఫార్సులు, ప్రభుత్వ నిర్ణయాలపై హైకోర్టు కీలక ప్రశ్నలు లేవనెత్తింది.

19 మంది అభ్యర్థులు అర్హులుగా గుర్తింపు

20 మంది అభ్యర్థుల్లో 19 మందిని జిల్లా విద్యాశాఖ అధికారులు అర్హులుగా గుర్తించినట్లు కోర్టు దృష్టికి వచ్చింది. GO Ms. No.111 ప్రకారం చివరిగా ఎంపికైన అభ్యర్థుల కంటే ఈ 19 మందికి ఎక్కువ మార్కులు ఉన్నట్లు వివరించారు.

అయితే, అర్హులుగా గుర్తించిన అభ్యర్థులకు సంబంధించి DEOలు చేసిన సిఫార్సులను ప్రభుత్వం ఎందుకు పరిగణనలోకి తీసుకోలేదని డివిజన్‌ బెంచ్‌ ప్రశ్నించింది.

వివరణ కోరిన హైకోర్టు

ప్రభుత్వ నిర్ణయంలో DEOల సిఫార్సులు ఎందుకు ప్రతిబింబించలేదో వివరించాలని హైకోర్టు కోరింది. 2022 జూలై 13న జారీ చేసిన ఉత్తర్వుల అమలుకు సంబంధించి అభ్యర్థులు సమర్పించిన వినతులు, DEOలు ఇచ్చిన నివేదికలను కోర్టుకు సమర్పించాలని ఆదేశించింది.

ఈ పత్రాలను పరిశీలించిన అనంతరం కోర్టు ఉత్తర్వుల అమలుపై తదుపరి విచారణ కొనసాగనుంది.