జేబులో ఫోన్ పేలడంతో వినియోగదారుడికి గాయాలు..

కొత్త ఫోన్ లేదా రూ.36,139 పరిహారం ఇవ్వాలని కమిషన్ ఆదేశం

అలీగఢ్: జేబులో ఉన్న మొబైల్ ఫోన్ పేలి గాయాలపాలైన ఉత్తరప్రదేశ్‌లోని అలీగఢ్‌కు చెందిన ప్రేమ్‌రాజ్ సింగ్‌కు వినియోగదారుల వివాదాల పరిష్కార కమిషన్ ఊరటనిచ్చింది. బాధితుడికి 45 రోజుల్లో కొత్త ఫోన్ ఇవ్వాలని లేదా రూ.36,139 పరిహారంగా చెల్లించాలని ఆదేశించినట్లు సమాచారం.

ప్రేమ్‌రాజ్ సింగ్ 2020లో ఓ మొబైల్ ఫోన్ కొనుగోలు చేశారు. అయితే కొద్ది రోజులకే ఫోన్ వేడెక్కుతుండటంతో సంబంధిత సంస్థకు ఫిర్యాదు చేసినప్పటికీ స్పందన రాలేదని పేర్కొన్నారు. 2023లో ఆయన జేబులో ఉన్న సమయంలో ఫోన్ ఒక్కసారిగా పేలడంతో గాయాలయ్యాయి.

ఆ ఫోన్‌లో తన వివాహానికి సంబంధించిన ఫొటోలు ఉండటంతో వాటిని కోల్పోవడం ఆయనకు తీవ్ర మనోవేదన కలిగించినట్లు సమాచారం. ఈ ఘటనపై న్యాయం కోరుతూ ఆయన వినియోగదారుల వివాదాల పరిష్కార కమిషన్‌ను ఆశ్రయించారు.

బాధితుడికి లోపాలున్న ఫోన్ అందించడం వల్లే ప్రమాదం జరిగిందని ఆయన తరఫు న్యాయవాది వాదించారు. ఫోన్ పేలడంతో గాయాలు కావడం, గతంలో వేడెక్కుతున్నట్లు ఫిర్యాదు చేసిన అంశాలను పరిశీలించిన కమిషన్ ఫోన్‌లో లోపాలు ఉన్నాయని నిర్ధారించినట్లు కథనాలు వెల్లడించాయి.

దీంతో 45 రోజుల్లో బాధితుడికి కొత్త ఫోన్ అందించాలని లేదా దాని విలువకు పరిహారంగా రూ.36,139 చెల్లించాలని కమిషన్ ఆదేశించినట్లు సమాచారం. వినియోగదారులు కొనుగోలు చేసే ఎలక్ట్రానిక్ పరికరాల్లో నాణ్యత, భద్రతకు సంబంధించిన సమస్యలు తలెత్తినప్పుడు వాటిపై ఫిర్యాదు చేసి న్యాయం పొందవచ్చనే విషయాన్ని ఈ ఘటన గుర్తుచేస్తోంది.