హైదరాబాద్ పరిధిలో మరో 16 కొత్త పోలీస్ స్టేషన్లు
నగర విస్తరణ, జనాభా పెరుగుదల నేపథ్యంలో పోలీస్ శాఖ కీలక నిర్ణయం
హైదరాబాద్ సిటీ | Ntoday News
హైదరాబాద్ నగర విస్తరణ, మారుతున్న భౌగోళిక పరిధి, పెరుగుతున్న ప్రజల భద్రతా అవసరాలను దృష్టిలో ఉంచుకుని తెలంగాణ పోలీస్ శాఖ కీలక నిర్ణయం తీసుకుంది. హైదరాబాద్, సైబరాబాద్, మల్కాజిగిరి, ఫ్యూచర్ సిటీ పోలీస్ కమిషనరేట్ల పరిధిలో కొత్తగా 16 పోలీస్ స్టేషన్లు ఏర్పాటు చేయాలని నిర్ణయించింది. ప్రతి కమిషనరేట్ పరిధిలో నాలుగు చొప్పున పోలీస్ స్టేషన్లు ఏర్పాటు చేయనున్నారు.
పోలీస్ స్టేషన్ల పునర్వ్యవస్థీకరణపై డీజీపీ సీవీ ఆనంద్ అధ్యక్షతన నాలుగు కమిషనరేట్ల పోలీస్ కమిషనర్లతో సమీక్ష సమావేశం నిర్వహించినట్లు సమాచారం. నేరాల నియంత్రణతో పాటు ప్రజలకు మెరుగైన పోలీస్ సేవలు, వేగవంతమైన స్పందన అందేలా పోలీస్ స్టేషన్ల పరిధులను పునర్నిర్వచించనున్నారు.
జనాభా, నేరాల తీవ్రత, నగర విస్తరణ వంటి అంశాలను పరిగణనలోకి తీసుకుని డివిజన్, జోన్ స్థాయిలో కొత్త పోలీస్ స్టేషన్ల పరిధులను ఖరారు చేయనున్నారు. ట్రాఫిక్ పోలీస్ విభాగాల పరిధులను కూడా కొత్త శాంతిభద్రతల విభజనకు అనుగుణంగా పునర్వ్యవస్థీకరించనున్నట్లు అధికారులు తెలిపారు.
ఇప్పటికే హైదరాబాద్, సైబరాబాద్, మల్కాజిగిరి, ఫ్యూచర్ సిటీగా నాలుగు పోలీస్ కమిషనరేట్ల వ్యవస్థ ఏర్పాటైంది. ఫ్యూచర్ సిటీ కమిషనరేట్‌ను సైబరాబాద్, రాచకొండ కమిషనరేట్ల నుంచి పునర్వ్యవస్థీకరించి ఏర్పాటు చేసినట్లు తెలంగాణ ప్రభుత్వం అధికారిక ఉత్తర్వుల్లో పేర్కొంది.
