నిత్యావసర ధరలకు కళ్లెం వేయాలి

పెరిగిన ధరలతో సామాన్యులపై భారం.. ధరలు తగ్గించాలని సీపీఐ డిమాండ్

గార్ల, అక్టోబర్ 29 (ఎన్ టుడే న్యూస్): ఎల్‌నినో ప్రభావం, వర్షాభావ పరిస్థితుల నేపథ్యంలో పెరిగిన నిత్యావసర సరుకుల ధరలను కేంద్ర, రాష్ట్ర ప్రభుత్వాలు తక్షణమే నియంత్రించాలని భారత కమ్యూనిస్టు పార్టీ (సీపీఐ) డిమాండ్ చేసింది. సామాన్య ప్రజలపై పెరుగుతున్న ఆర్థిక భారాన్ని తగ్గించేందుకు రేషన్ దుకాణాల ద్వారా అన్ని నిత్యావసర సరుకులను తక్కువ ధరలకు అందించాలని కోరింది.

పెరిగిన ధరలతో పేద, మధ్యతరగతి కుటుంబాలకు ఇబ్బందులు

గార్ల మండల కేంద్రంలో గురువారం రాగం రమేష్ అధ్యక్షతన నిర్వహించిన సీపీఐ జనరల్ బాడీ సమావేశంలో పార్టీ రాష్ట్ర సమితి సభ్యుడు కట్టేబోయిన శ్రీనివాస్ మాట్లాడారు. వర్షాభావం, కరువు పరిస్థితుల కారణంగా కూరగాయలు, బియ్యం, వంట నూనెలు, పప్పు దినుసులు సహా నిత్యావసర సరుకుల ధరలు పెరిగాయని అన్నారు.

రోజురోజుకూ పెరుగుతున్న ధరలతో పేద, మధ్యతరగతి కుటుంబాలు ఆర్థికంగా ఇబ్బందులు ఎదుర్కొంటున్నాయని ఆవేదన వ్యక్తం చేశారు. ధరల నియంత్రణకు కేంద్ర, రాష్ట్ర ప్రభుత్వాలు తక్షణ చర్యలు చేపట్టి ప్రజలకు ఉపశమనం కల్పించాలని కోరారు.

బ్లాక్ మార్కెటింగ్‌ను అరికట్టాలి

నిత్యావసర సరుకుల ధరలను నియంత్రించడంలో ప్రభుత్వాలు విఫలమయ్యాయని శ్రీనివాస్ విమర్శించారు. కొందరు వ్యాపారులు సరుకులను నిల్వ ఉంచి కృత్రిమ కొరత సృష్టించడం, బ్లాక్ మార్కెటింగ్‌కు పాల్పడటం వంటి చర్యలను అరికట్టాలని డిమాండ్ చేశారు.

ప్రభుత్వాలు మార్కెట్‌పై పర్యవేక్షణ పెంచి, అక్రమంగా సరుకులను నిల్వ చేసే వ్యాపారులపై కఠిన చర్యలు తీసుకోవాలని సీపీఐ నాయకులు కోరారు. రేషన్ దుకాణాల ద్వారా ప్రజలకు నిత్యావసర సరుకులను తక్కువ ధరలకు సరఫరా చేయాలని డిమాండ్ చేశారు.

సమావేశంలో పాల్గొన్న నాయకులు

ఈ సమావేశంలో సీపీఐ మండల కార్యదర్శి జంపాల వెంకన్న, నాయకులు రాగం రమేష్, ధరావత్ వీరన్న, భూక్యా హరినాయక్, ధూపాటి జనార్ధన్, కట్టేబోయిన పిచ్చయ్య, భీముడు, బిక్షమయ్య, బాదం రాజేష్, చెవుకల బిక్షం, లావుడియా ఉపేందర్, ధరావత్ సుమన్ తదితరులు పాల్గొన్నారు.