పరిసరాల పరిశుభ్రతతోనే ఆరోగ్యకరమైన జీవనం

వావిళ్లపల్లిలో స్వచ్ఛత కార్యక్రమం.. సర్పంచ్ అయితరాజు సరళ చంద్రయ్య

వావిళ్లపల్లి, అక్టోబర్ 9: యాదాద్రి భువనగిరి జిల్లా సంస్థాన్ నారాయణపురం మండలం వావిళ్లపల్లి గ్రామంలో నిర్వహించిన స్వచ్ఛత కార్యక్రమంలో గ్రామ సర్పంచ్ అయితరాజు సరళ చంద్రయ్య పాల్గొన్నారు. ఈ సందర్భంగా గ్రామ పరిసరాలను పరిశుభ్రంగా ఉంచుకోవాలని ప్రజలకు సూచించారు.

డెంగ్యూ, టైఫాయిడ్ వంటి వ్యాధుల వ్యాప్తిని అరికట్టేందుకు వ్యక్తిగత పరిశుభ్రతతో పాటు పరిసరాల పరిశుభ్రతకు ప్రతి ఒక్కరూ ప్రాధాన్యత ఇవ్వాలని కోరారు. ఇళ్ల పరిసరాల్లో నీరు నిల్వ ఉండకుండా చూసుకోవాలని, మురుగునీటిని ఎప్పటికప్పుడు తొలగించాలని సూచించారు. దోమల వృద్ధిని అరికట్టేందుకు తగిన జాగ్రత్తలు తీసుకోవాలని పిలుపునిచ్చారు.

పరిశుభ్రతతోనే ఆరోగ్యకరమైన జీవనం సాధ్యమని, గ్రామాన్ని శుభ్రంగా ఉంచడం ప్రతి ఒక్కరి బాధ్యత అని సర్పంచ్ పేర్కొన్నారు. గ్రామ ప్రజలందరూ స్వచ్ఛత కార్యక్రమాల్లో భాగస్వాములై పరిశుభ్రమైన వావిళ్లపల్లి నిర్మాణానికి సహకరించాలని కోరారు.