1033 హైవే హెల్ప్‌లైన్‌కు ఏఐ అప్‌గ్రేడ్
జాతీయ రహదారులపై అత్యవసర సేవలు మరింత వేగంగా జాతీయ రహదారులపై ప్రయాణించే వాహనదారులు, ప్రజలకు మరింత వేగవంతమైన సహాయం అందించేందుకు భారత జాతీయ రహదారుల ప్రాధికార సంస్థ తన 1033 జాతీయ రహదారి హెల్ప్‌లైన్‌ను ఆధునిక సాంకేతికతతో అప్‌గ్రేడ్ చేయనుంది. ప్రస్తుతం అందుబాటులో ఉన్న 1033 హెల్ప్‌లైన్‌కు కృత్రిమ మేధ సహా పలు అధునాతన సాంకేతిక పరిజ్ఞానాలను అనుసంధానం చేయనున్నట్లు రోడ్డు రవాణా, రహదారుల మంత్రిత్వ శాఖ వెల్లడించింది. అప్‌గ్రేడ్ చేసిన వ్యవస్థలో కృత్రిమ మేధ, నిజ సమయ ప్రాంత గుర్తింపు, అత్యవసర పరిస్థితులకు తక్షణ స్పందించే స్మార్ట్ వ్యవస్థలను వినియోగించనున్నారు. దీంతో హెల్ప్‌లైన్‌కు ఫోన్ చేసే వ్యక్తి ఉన్న ప్రాంతాన్ని మరింత ఖచ్చితంగా గుర్తించే అవకాశం ఉంటుంది. అదేవిధంగా వివిధ భారతీయ భాషల్లో వచ్చే ఫోన్ కాల్స్‌ను కృత్రిమ మేధ సాయంతో అర్థం చేసుకుని, సమస్య స్వభావాన్ని వేగంగా గుర్తించేందుకు చర్యలు తీసుకోనున్నారు. ప్రమాదాలు, వాహనాల నిలిచిపోవడం, రహదారిపై ఇతర అత్యవసర పరిస్థితులు వంటి సందర్భాల్లో అవసరమైన సహాయాన్ని సంబంధిత ప్రాంతానికి త్వరగా పంపేలా వ్యవస్థను రూపొందించనున్నారు. ఈ సాంకేతిక మార్పులతో హైవేలపై అత్యవసర సేవల స్పందన సమయం తగ్గడంతో పాటు, ప్రయాణికులకు మరింత సమర్థవంతమైన సహాయం అందే అవకాశం ఉంది. జాతీయ రహదారులపై భద్రత, అత్యవసర సేవల సామర్థ్యాన్ని మెరుగుపరచడంలో 1033 హెల్ప్‌లైన్ అప్‌గ్రేడ్ కీలకంగా మారనుంది.
