ఏపీలో కాంట్రాక్టు ఉద్యోగులకు మరో అవకాశం

అమరావతి: ఆంధ్రప్రదేశ్‌లో అర్హత కలిగిన కాంట్రాక్టు ఉద్యోగుల క్రమబద్ధీకరణకు ప్రభుత్వం మరో అవకాశం కల్పించింది. ‘నిధి’ పోర్టల్ ద్వారా దరఖాస్తులు సమర్పించేందుకు గడువును ఆర్థిక శాఖ డిసెంబరు 31 వరకు పొడిగించింది.

సాంకేతిక సమస్యల కారణంగా గతంలో నిర్ణయించిన గడువు ముగిసినప్పటికీ, ఉద్యోగుల ప్రయోజనాలను దృష్టిలో ఉంచుకుని గడువు పొడిగించినట్లు ఆర్థిక శాఖ తెలిపింది. అర్హత కలిగిన కాంట్రాక్టు ఉద్యోగులు డిసెంబరు 31లోగా ‘నిధి’ పోర్టల్ ద్వారా దరఖాస్తులు సమర్పించాలని ఆర్థిక శాఖ కార్యదర్శి వాడ్రేవు వినయ్ చంద్ సూచించారు.