బాలకృష్ణకు మంత్రి పదవి..?
హిందూపురం ఎమ్మెల్యే నందమూరి బాలకృష్ణకు మంత్రి పదవి దక్కనున్నట్లు రాజకీయ వర్గాల్లో ప్రచారం సాగుతోంది. 2014 నుంచి వరుసగా మూడు సార్లు ఎమ్మెల్యేగా విజయం సాధించిన బాలకృష్ణ తన రాజకీయ ప్రస్థానంలో ప్రత్యేక గుర్తింపు పొందారు.
ఇటీవల సినిమాల కంటే రాజకీయాలపైనే ఎక్కువ దృష్టి సారించనున్నారని, భవిష్యత్తులో పూర్తి స్థాయిలో ప్రజా సేవకే సమయం కేటాయిస్తారని పార్టీ వర్గాల్లో చర్చ జరుగుతోంది. ఇదే సమయంలో రాష్ట్ర మంత్రివర్గ విస్తరణపై ఊహాగానాలు వినిపిస్తుండటంతో బాలకృష్ణకు మంత్రి పదవి లభించే అవకాశాలపై రాజకీయ చర్చలు ఊపందుకున్నాయి.
అలాగే రాజకీయంగా మరింత పట్టు సాధించేందుకు హిందూపురంలోనే ఎక్కువ సమయం గడపాలని, అందుకోసం అక్కడ సొంత ఇల్లు నిర్మించుకునే ప్రయత్నాలు చేస్తున్నట్లు సమాచారం. అయితే మంత్రి పదవిపై ఇప్పటివరకు అధికారిక ప్రకటన వెలువడలేదు. ప్రస్తుతం జరుగుతున్నవి కేవలం రాజకీయ వర్గాల ప్రచారమే.
