ఏలూరు జిల్లాలో మూడు దశల్లో గ్రామ పంచాయతీ ఎన్నికలు.. నవంబర్ 26 నుంచి పోలింగ్ ప్రారంభం

ఏలూరు జిల్లా: జిల్లాలో 2026 గ్రామ పంచాయతీ ఎన్నికలను మూడు దశల్లో నిర్వహించేందుకు జిల్లా యంత్రాంగం షెడ్యూల్ ప్రకటించింది. జిల్లా కలెక్టర్ కె. వెట్రిసెల్వి ఎన్నికల వివరాలను వెల్లడించారు. జిల్లాలో మొత్తం 544 గ్రామ పంచాయతీలు, 5,696 వార్డు స్థానాలకు ఎన్నికలు జరగనున్నాయి. నవంబర్ 26 నుంచి ప్రారంభమయ్యే పోలింగ్ ప్రక్రియ డిసెంబర్ 2వ తేదీతో ముగియనుంది. ప్రతి దశలోనూ పోలింగ్ ముగిసిన రోజే ఓట్ల లెక్కింపు చేపట్టి ఫలితాలను ప్రకటించనున్నారు. మొదటి దశ నవంబర్ 26న మొదటి విడతలో బుట్టాయగూడెం, జంగారెడ్డిగూడెం, జీలుగుమిల్లి, కామవరపుకోట, కొయ్యలగూడెం, కుక్కునూరు, పోలవరం, టి.నరసాపురం, వేలేరుపాడు, చింతలపూడి, లింగపాలెం మండలాల్లోని 177 గ్రామ పంచాయతీలకు ఎన్నికలు నిర్వహించనున్నారు. నవంబర్ 15 నుంచి 17వ తేదీ వరకు నామినేషన్లు స్వీకరిస్తారు. నవంబర్ 26న ఉదయం 7 నుంచి మధ్యాహ్నం 1 గంట వరకు పోలింగ్ జరుగుతుంది. అదే రోజు మధ్యాహ్నం 2 గంటల నుంచి ఓట్ల లెక్కింపు చేపడతారు. రెండో దశ నవంబర్ 29న రెండో విడతలో భీమడోలు, కైకలూరు, కలిదిండి, మండవల్లి, ముదినేపల్లి, నిడమర్రు, ఉంగుటూరు, ద్వారకా తిరుమల మండలాల్లోని 194 గ్రామ పంచాయతీలకు ఎన్నికలు జరగనున్నాయి. నవంబర్ 18 నుంచి 20వ తేదీ వరకు నామినేషన్ల స్వీకరణ ఉంటుంది. నవంబర్ 29న ఉదయం 7 నుంచి మధ్యాహ్నం 1 గంట వరకు పోలింగ్ నిర్వహించి, అదే రోజు మధ్యాహ్నం 2 గంటల నుంచి ఓట్ల లెక్కింపు చేపడతారు. మూడో దశలో చాట్రాయి, నూజివీడు మండలాలు మూడో విడతలో దెందులూరు, ఏలూరు, పెదపాడు, పెదవేగి, అగిరిపల్లి, చాట్రాయి, ముసునూరు, నూజివీడు మండలాల్లోని 173 గ్రామ పంచాయతీలకు ఎన్నికలు నిర్వహించనున్నారు. నవంబర్ 21 నుంచి 23వ తేదీ వరకు నామినేషన్లు స్వీకరిస్తారు. డిసెంబర్ 2న ఉదయం 7 నుంచి మధ్యాహ్నం 1 గంట వరకు పోలింగ్ జరుగుతుంది. అదే రోజు మధ్యాహ్నం 2 గంటల నుంచి ఓట్ల లెక్కింపు ప్రారంభమవుతుంది. మూడు దశల్లో ఎన్నికల నిర్వహణకు అధికారులు ఏర్పాట్లు చేపడుతున్నారు. ముఖ్యంగా మూడో దశలో చాట్రాయి, నూజివీడు మండలాల్లో ఎన్నికలు జరగనుండటంతో ఆయా ప్రాంతాల్లో రాజకీయ వర్గాల్లో ఎన్నికల సందడి మొదలుకానుంది. అభ్యర్థుల ఎంపిక, నామినేషన్ల దాఖలు, ప్రచార కార్యక్రమాలపై గ్రామాల్లో ఆసక్తి నెలకొంది.