తిరువూరు నియోజకవర్గంలో మూడో విడతలోనే గ్రామపంచాయతీ ఎన్నికలు రెండో విడత నుంచి మూడో విడతకు మార్పు.. అధికారిక ప్రకటన విడుదల

ఎన్టీఆర్ జిల్లా, తిరువూరు: గ్రామపంచాయతీ ఎన్నికలకు సంబంధించి కీలక మార్పు చోటుచేసుకుంది. తిరువూరు నియోజకవర్గ పరిధిలోని అన్ని గ్రామపంచాయతీలకు మూడో విడతలో ఎన్నికలు నిర్వహించనున్నట్లు అధికారిక ప్రకటన వెలువడింది. తొలుత విడుదల చేసిన ఎన్నికల షెడ్యూల్‌లో రెండో విడతలోనే ఎన్నికలు నిర్వహించేందుకు ఆదేశాలు జారీ చేశారు. అయితే వివిధ అంశాలు, ఎన్నికల నిర్వహణకు సంబంధించిన పరిస్థితులను పరిగణనలోకి తీసుకున్న అధికారులు తాజాగా నిర్ణయాన్ని మార్చారు. ఈ మేరకు తిరువూరు నియోజకవర్గంలోని అన్ని గ్రామపంచాయతీల సర్పంచ్, వార్డు సభ్యుల ఎన్నికలను మూడో విడతలో నిర్వహించనున్నట్లు ప్రకటించారు. తాజా నిర్ణయంతో గతంలో రెండో విడతలో ఎన్నికలు జరుగుతాయని భావించిన ఆశావహులు, రాజకీయ పార్టీల నాయకులు తమ ఎన్నికల వ్యూహాలను మార్చుకోవాల్సిన పరిస్థితి ఏర్పడింది.