ఏపీ లో పంచాయతీ నామినేషన్ల ప్రక్రియపై హైకోర్టు కీలక ఆదేశాలు

నామినేషన్ కేంద్రాల ఏర్పాటు, ఎన్నికల నోటీసుల జారీపై స్పష్టత ఆంధ్రప్రదేశ్‌లో గ్రామ పంచాయతీ ఎన్నికల నామినేషన్ల ప్రక్రియకు సంబంధించి హైకోర్టు కీలక ఉత్తర్వులు జారీ చేసింది. నామినేషన్ల స్వీకరణలో అభ్యర్థులకు ఎలాంటి ఇబ్బందులు కలగకుండా అవసరమైన ఏర్పాట్లు చేయాలని స్పష్టం చేసింది. హైకోర్టు ఇచ్చిన ఆదేశాల ప్రకారం నామినేషన్ కేంద్రాలను సంబంధిత రిటర్నింగ్ అధికారులు (ఆర్వోలు) నోటిఫై చేయాలి. ఎన్నికల నోటీసును ఫారం-1 ద్వారా జారీ చేయాలి. నామినేషన్ల స్వీకరణకు సంబంధించిన కేంద్రం పేరు, తేదీ, సమయాన్ని ఫారం-1లో స్పష్టంగా పేర్కొనాలి. అభ్యర్థులు నామినేషన్లు దాఖలు చేసేందుకు ఇబ్బందులు ఎదుర్కోకుండా అనువైన ప్రాంతాల్లో కేంద్రాలను ఏర్పాటు చేయాలని న్యాయస్థానం సూచించింది. అలాగే అసిస్టెంట్ రిటర్నింగ్ అధికారుల (ఏఆర్వోలు) నియామకానికి కూడా అనుమతించింది. అయితే ఏఆర్వోలు స్వతంత్రంగా కాకుండా సంబంధిత రిటర్నింగ్ అధికారుల నియంత్రణలోనే విధులు నిర్వహించాలని స్పష్టం చేసింది. ఈ ఆదేశాలతో పంచాయతీ ఎన్నికల నామినేషన్ల నిర్వహణలో అధికారుల బాధ్యతలు, విధివిధానాలపై స్పష్టత ఏర్పడింది.