ఇబ్రహీంపట్నంలో మహిళకు పునర్జన్మ.. కాలువలో దూకి ఆత్మహత్యాయత్నం డయల్‌ 112కు సమాచారం..

క్షణాల్లో ఘటనా స్థలానికి చేరుకున్న పోలీసులు సకాలంలో స్పందించి మహిళను రక్షించిన ఖాకీలు కుటుంబ సమస్యలతో తీవ్ర మనస్తాపానికి గురైన ఓ మహిళ కాలువలో దూకి ఆత్మహత్యకు ప్రయత్నించగా, ఇబ్రహీంపట్నం పోలీసులు అప్రమత్తంగా వ్యవహరించి ఆమె ప్రాణాలను కాపాడారు. డయల్‌ 112కు అందిన సమాచారం ఓ మహిళకు పునర్జన్మనిచ్చింది. పోలీసుల వేగవంతమైన స్పందనతో పెను ప్రమాదం తప్పింది. కుటుంబ సమస్యల కారణంగా మానసిక ఆవేదనకు గురైన మహిళ కాలువలో దూకి ఆత్మహత్యకు యత్నించినట్లు సమాచారం అందింది. వెంటనే స్పందించిన పోలీస్‌ కంట్రోల్‌ రూం సిబ్బంది ఈ విషయాన్ని స్థానిక ఇబ్రహీంపట్నం పోలీసులకు చేరవేశారు. సమాచారం అందుకున్న పోలీసులు ఏమాత్రం ఆలస్యం చేయకుండా హుటాహుటిన ఘటనా స్థలానికి చేరుకున్నారు. పరిస్థితిని గుర్తించి తక్షణమే చర్యలు చేపట్టి కాలువలో ఉన్న మహిళను సురక్షితంగా బయటకు తీసుకొచ్చారు. దీంతో ఆమె ప్రాణాపాయం నుంచి బయటపడింది. అనంతరం మహిళకు, ఆమె కుటుంబ సభ్యులకు పోలీసులు కౌన్సెలింగ్‌ నిర్వహించారు. కుటుంబ సమస్యలను ధైర్యంగా ఎదుర్కోవాలని, ఆత్మహత్య ఏ సమస్యకూ పరిష్కారం కాదని సూచించారు. అనంతరం ఆమెను కుటుంబ సభ్యులకు అప్పగించారు. పోలీసుల సమయస్ఫూర్తి, తక్షణ స్పందనతో ఒక నిండు ప్రాణం నిలవడంపై నగర పోలీస్‌ కమిషనర్‌ ఎస్‌.వి.రాజశేఖరబాబు పోలీసు సిబ్బందిని అభినందించారు. ఆపదలో ఉన్నవారు, సమస్యలతో సతమతమవుతున్నవారు భయపడకుండా పోలీసులను ఆశ్రయించాలని, అత్యవసర పరిస్థితుల్లో డయల్‌ 112కు సమాచారం అందించాలని పోలీసులు సూచించారు.