చిలకలూరిపేట బైపాస్పై పెట్రోల్ ట్యాంకర్ బోల్తా
చిలకలూరిపేట బైపాస్పై పెట్రోల్ ట్యాంకర్ బోల్తా
చిలకలూరిపేట: చిలకలూరిపేట బైపాస్ రోడ్డులోని లింగాయపాలెం సమీపంలో ఇంధనంతో వెళ్తున్న పెట్రోల్ ట్యాంకర్ అదుపుతప్పి బోల్తా పడింది. ట్యాంకర్లో భారీగా ఇంధనం ఉండటంతో ప్రమాద తీవ్రతపై స్థానికులు, వాహనదారుల్లో ఆందోళన నెలకొంది. ఏ చిన్న నిప్పురవ్వ తగిలినా పెను ప్రమాదం సంభవించే అవకాశం ఉండటంతో పరిసర ప్రాంతాల్లో ఉద్రిక్త వాతావరణం ఏర్పడింది.
సమాచారం అందుకున్న వెంటనే పోలీసులు, అగ్నిమాపక సిబ్బంది హుటాహుటిన సంఘటనా స్థలానికి చేరుకున్నారు. ముందస్తు జాగ్రత్తగా వాహనాల రాకపోకలను నియంత్రించి, ప్రమాదం మరింత విస్తరించకుండా రక్షణ చర్యలు చేపట్టారు. ఆ మార్గంలో వెళ్లే వాహనాలను ప్రత్యామ్నాయ మార్గాలకు మళ్లించారు. ట్యాంకర్ నుంచి ఇంధనం లీకవుతుందా? అనే అంశాన్ని అధికారులు పరిశీలిస్తూ అప్రమత్తంగా వ్యవహరించారు.
పోలీసులు, అగ్నిమాపక సిబ్బంది సకాలంలో స్పందించడంతో ఎలాంటి అవాంఛనీయ ఘటన చోటుచేసుకోకుండా పరిస్థితిని అదుపులోకి తీసుకువచ్చారు. పెట్రోల్ ట్యాంకర్ బోల్తా పడినప్పటికీ పెద్ద ప్రమాదం తప్పడంతో స్థానికులు, వాహనదారులు ఊపిరిపీల్చుకున్నారు. ప్రమాదానికి గల కారణాలపై పోలీసులు దర్యాప్తు చేస్తున్నారు.
