తెలంగాణలో మూడో రోజు బతుకమ్మ సంబురాలు

నేడు ముద్దపప్పు బతుకమ్మ.. గౌరమ్మకు ప్రత్యేక పూజలు

తెలంగాణ: రాష్ట్రవ్యాప్తంగా బతుకమ్మ సంబురాలు ఘనంగా కొనసాగుతున్నాయి. పండుగలో భాగంగా మూడో రోజైన నేడు మహిళలు ముద్దపప్పు బతుకమ్మను భక్తిశ్రద్ధలతో జరుపుకుంటున్నారు.

ఈ సందర్భంగా మహిళలు వివిధ రకాల రంగురంగుల పూలతో బతుకమ్మలను అందంగా పేర్చి, గౌరమ్మకు ప్రత్యేక పూజలు నిర్వహిస్తారు. అమ్మవారికి అత్యంత ప్రీతిపాత్రమైన ముద్దపప్పు, అన్నాన్ని నైవేద్యంగా సమర్పిస్తారు.

అనంతరం సంప్రదాయ పాటలు పాడుతూ బతుకమ్మ చుట్టూ ఆడిపాడుతారు. పూజలు పూర్తయ్యాక ముద్దపప్పు, అన్నం ప్రసాదాన్ని మహిళలు వాయనంగా ఒకరికొకరు ఇచ్చిపుచ్చుకుంటారు. ఈ వేడుకలతో తెలంగాణ పల్లెలు, పట్టణాల్లో పండుగ వాతావరణం నెలకొంది.