మడుపల్లి ఉన్నత పాఠశాలలో అంబరాన్నంటిన బతుకమ్మ సంబురాలు

సంప్రదాయ దుస్తుల్లో విద్యార్థినుల సందడి.. ఆటపాటలతో పాఠశాలలో పండుగ వాతావరణం

మధిర, ఖమ్మం జిల్లా: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సంబురాలు మధిర మండలం మడుపల్లి గ్రామంలోని పీఎం శ్రీ జిల్లా పరిషత్ ఉన్నత పాఠశాలలో శుక్రవారం ఘనంగా నిర్వహించారు. బతుకమ్మ పండుగ ప్రారంభాన్ని పురస్కరించుకుని పాఠశాల ఆవరణలో విద్యార్థులు, ఉపాధ్యాయులు ఉత్సాహంగా వేడుకల్లో పాల్గొన్నారు. రంగురంగుల పూలతో బతుకమ్మలను పేర్చి, సంప్రదాయ పాటలు, కోలాటాలు, నృత్యాలతో సందడి చేశారు.

తెలంగాణ ఆడపడుచుల ఆత్మీయతకు, ప్రకృతితో మమేకమయ్యే జీవన విధానానికి ప్రతీకగా నిలిచే బతుకమ్మ పండుగను విద్యార్థులకు పరిచయం చేయడంతో పాటు మన సంస్కృతి, సంప్రదాయాల గొప్పతనాన్ని తెలియజేయాలనే ఉద్దేశంతో పాఠశాలలో ఈ వేడుకలను నిర్వహించారు. మహిళా ఉపాధ్యాయులు, విద్యార్థినులు సంప్రదాయ దుస్తులు ధరించి, వివిధ రకాల పూలతో ఆకర్షణీయంగా బతుకమ్మలను పేర్చారు. అనంతరం బతుకమ్మ పాటలు పాడుతూ, కోలాటాలు ఆడుతూ ఆనందోత్సాహాల మధ్య వేడుకలను జరుపుకున్నారు. దీంతో పాఠశాల ప్రాంగణమంతా పండుగ శోభను సంతరించుకుంది.

ఈ సందర్భంగా పాఠశాల ప్రధానోపాధ్యాయుడు తోట నరసింహారావు మాట్లాడుతూ, తెలంగాణ సంస్కృతి, సంప్రదాయాలను ప్రతిబింబించే బతుకమ్మ పండుగను విద్యార్థులు ఎంతో ఉత్సాహంగా నిర్వహించడం అభినందనీయమని అన్నారు. ఇలాంటి కార్యక్రమాలు విద్యార్థుల్లో సాంస్కృతిక విలువలను పెంపొందించడంతో పాటు ఐక్యత, స్నేహభావం, సంప్రదాయాల పట్ల గౌరవాన్ని పెంచుతాయని పేర్కొన్నారు. విద్యార్థులు చదువుతో పాటు మన సంస్కృతి, సంప్రదాయాలను కూడా గౌరవించాలని సూచించారు.

రాబోయే దసరా పండుగ విద్యార్థుల జీవితాల్లో, వారి కుటుంబాల్లో సరికొత్త వెలుగులు నింపాలని, అందరికీ సుఖసంతోషాలు, ఆయురారోగ్యాలు కలగాలని ఆయన ఆకాంక్షించారు. వేడుకల్లో ఉత్సాహంగా పాల్గొన్న విద్యార్థులను ప్రత్యేకంగా అభినందించారు.

ఈ కార్యక్రమంలో ఉపాధ్యాయులు శైలజ, సంధ్యలక్ష్మి, శ్రీదేవి, మాధురి, సుష్మ, సీత, సువర్ణ, భానుతో పాటు పాఠశాల ఉపాధ్యాయులు, విద్యార్థులు పాల్గొన్నారు.