మధిరలో చేగువేరా 59వ వర్ధంతి వేడుకలు
పీడిత ప్రజల విముక్తి కోసం పోరాడిన విప్లవ యోధుడు చేగువేరా
ఖమ్మం జిల్లా మధిర పట్టణంలో అఖిల భారత యువజన సమాఖ్య (AIYF), అఖిల భారత విద్యార్థి సమాఖ్య (AISF) మధిర మండల సమితుల ఆధ్వర్యంలో శుక్రవారం ప్రపంచ విప్లవ యోధుడు చేగువేరా 59వ వర్ధంతిని నిర్వహించారు. ఈ సందర్భంగా ఆయన చిత్రపటానికి పూలమాల వేసి ఘనంగా నివాళులర్పించారు.
ఈ సందర్భంగా జరిగిన సభలో పలువురు వక్తలు మాట్లాడుతూ, చేగువేరా దోపిడీకి వ్యతిరేకంగా, పీడిత ప్రజల విముక్తి కోసం తన వైద్య వృత్తిని, సుఖవంతమైన జీవితాన్ని సైతం వదులుకొని పోరాట బాట పట్టిన గొప్ప విప్లవ యోధుడని కొనియాడారు. సామాజిక అసమానతలకు వ్యతిరేకంగా, అణగారిన ప్రజల హక్కుల కోసం ఆయన సాగించిన పోరాటం ప్రపంచవ్యాప్తంగా ఎంతోమంది యువతకు స్ఫూర్తిగా నిలిచిందని పేర్కొన్నారు.
1967 అక్టోబర్ 9న బొలీవియాలో హత్యకు గురైన చేగువేరా, తన విప్లవ భావజాలంతో ప్రపంచ యువతపై చెరగని ముద్ర వేశారని వక్తలు తెలిపారు. అన్యాయాన్ని ప్రశ్నించడం, దోపిడీకి వ్యతిరేకంగా నిలబడటం, సమాజంలో సమానత్వం కోసం పోరాడటం వంటి విలువలను ఆయన జీవితం చాటిచెబుతోందని అన్నారు. ప్రజల హక్కుల సాధన కోసం యువత ముందుకు రావాలని పిలుపునిచ్చారు.
ఈ కార్యక్రమంలో AIYF మధిర మండల కార్యదర్శి సంపసాల సాయి, AISF మధిర మండల ఉపాధ్యక్షుడు కొండూరు వెంకటకృష్ణ, మండల నాయకులు అశోక్, జస్వంత్, చంద్రహాస్, వివేక్, వెంకీ, మణికంఠ, పవన్ కళ్యాణ్, ఉపేంద్ర, గోపి, మోహన్ క్రాంతి, మాధవ్, నరేంద్ర, రవి, మురళి, మనోజ్, తనీష్, వరుణ్ తదితరులు పాల్గొన్నారు.
