రామచంద్రపురంలో బతుకమ్మ, దసరా వేడుకల తేదీలు ఖరారు

రామచంద్రపురం: రామచంద్రపురం డివిజన్‌లోని మందుముల శ్రీనివాస్ నగర్ కాలనీలో ఉన్న శ్రీశ్రీశ్రీ ఆంజనేయ స్వామి ఆలయం వద్ద బతుకమ్మ, దసరా, జమ్మి పూజ, రావణ దహన కార్యక్రమాల నిర్వహణ తేదీలు ఖరారు చేశారు. ఆలయ కమిటీ అధ్యక్షుడు లక్ష్మణ్, గ్రామ పురోహితుడు బాలకృష్ణ పంతులు, కమిటీ సభ్యుల ఆధ్వర్యంలో నిర్వహించిన సమావేశంలో ఈ నిర్ణయం తీసుకున్నారు.

ఈ సమావేశానికి రామచంద్రపురం తాజా మాజీ కార్పొరేటర్ బూరుగడ్డ పుష్ప నగేష్ ముఖ్య అతిథిగా హాజరయ్యారు. గ్రామ పెద్దలు, వివిధ కుల సంఘాల ప్రతినిధులు, నాయకుల సమక్షంలో పండుగల నిర్వహణపై చర్చించారు. అందరి అభిప్రాయాలు తీసుకుని, ఏకాభిప్రాయంతో వేడుకల తేదీలు, సమయాలను ఖరారు చేశారు.

నిర్ణయం ప్రకారం అక్టోబర్ 17న సాయంత్రం 5:30 గంటలకు బతుకమ్మ వేడుకలు నిర్వహించనున్నారు. అక్టోబర్ 20న సాయంత్రం 5:35 గంటలకు దసరా వేడుకలతో పాటు జమ్మి పూజ, రావణ దహన కార్యక్రమాలు నిర్వహించాలని నిర్ణయించారు.

పండుగలను గ్రామ ప్రజలందరూ కలిసికట్టుగా, సంప్రదాయబద్ధంగా నిర్వహించుకోవాలని సమావేశంలో పాల్గొన్న పెద్దలు అభిప్రాయపడ్డారు. వేడుకలకు అవసరమైన ఏర్పాట్లను సమన్వయంతో చేపట్టాలని నిర్ణయించారు.

ఈ సమావేశంలో గ్రామ పెద్దలు, స్థానిక నాయకులు, వివిధ సంఘాలు, కుల సంఘాల ప్రతినిధులు పాల్గొన్నారు.