జింకలపాలెం అంగన్వాడీలో చిన్నారులకు నులిపురుగుల నివారణ మాత్రల పంపిణీ
ఎన్టీఆర్ జిల్లా తిరువూరు నియోజకవర్గం గంపలగూడెం మండలం జింకలపాలెం గ్రామంలోని అంగన్వాడీ కేంద్రంలో ఆరోగ్యశాఖ ఆధ్వర్యంలో సోమవారం చిన్నారులకు నులిపురుగుల నివారణ కోసం అల్బెండజోల్ మాత్రలను పంపిణీ చేశారు. ఈ సందర్భంగా చిన్నారులకు వ్యక్తిగత, పరిసరాల పరిశుభ్రతపై అవగాహన కల్పించారు.
అనంతరం జరిగిన అవగాహన కార్యక్రమంలో కమ్యూనిటీ హెల్త్ ఆఫీసర్ జ్యోత్స మాట్లాడుతూ చిన్నారులు చిన్న వయస్సు నుంచే పరిశుభ్రతపై అవగాహన పెంచుకోవాలని సూచించారు. భోజనానికి ముందు, భోజనం చేసిన తర్వాత, ఆటలు ఆడిన అనంతరం, మరుగుదొడ్డికి వెళ్లి వచ్చిన తర్వాత చేతులను సబ్బుతో శుభ్రంగా కడుక్కోవాలని తెలిపారు.
ప్రతిరోజూ స్నానం చేసిన అనంతరం శుభ్రమైన ఉతికిన దుస్తులు ధరించాలని సూచించారు. గోళ్లను ఎప్పటికప్పుడు కత్తిరించుకోవడంతో పాటు వాటి కింద మురికి చేరకుండా చూసుకోవాలని వివరించారు. దంతాలను ప్రతిరోజూ శుభ్రంగా ఉంచుకోవాలని, పరిసరాలను పరిశుభ్రంగా ఉంచడం ద్వారా అనేక రకాల అనారోగ్య సమస్యలను నివారించవచ్చని తెలిపారు.
ఈ కార్యక్రమంలో అంగన్వాడీ ఉపాధ్యాయురాలు షేక్ మీరాబీ, ఆశా కార్యకర్తలు, ఆరోగ్య సిబ్బంది, చిన్నారులు తదితరులు పాల్గొన్నారు.
