రీసర్వే పూర్తయిన మల్లేలలో పట్టాదారు పాస్‌పుస్తకాల పంపిణీ
తిరువూరు, అక్టోబర్ 07: ప్రభుత్వం ప్రతిష్ఠాత్మకంగా చేపట్టిన రీసర్వే కార్యక్రమంలో భాగంగా తిరువూరు మండలం మల్లెల రెవెన్యూ గ్రామంలో రీసర్వే ప్రక్రియ పూర్తయింది. ఈ సందర్భంగా రాజముద్రతో కూడిన పట్టాదారు పాస్‌పుస్తకాల పంపిణీ కార్యక్రమాన్ని నిర్వహించారు.
రీసర్వేలో భాగంగా రైతుల భూముల హద్దులు, విస్తీర్ణాలను నిర్ధారించి, భూములకు సంబంధించిన వివరాలను ఖచ్చితంగా నమోదు చేశారు. అనంతరం మల్లెల గ్రామానికి చెందిన రైతులకు తిరువూరు నియోజకవర్గ ఎమ్మెల్యే కొలికపూడి శ్రీనివాసరావు, తిరువూరు రెవెన్యూ డివిజన్ అధికారి ఏ. కుమార్ పట్టాదారు పాస్‌పుస్తకాలను అందజేశారు.
రీసర్వే ద్వారా భూముల వివరాలు, హద్దులు స్పష్టంగా నమోదు కావడంతో భవిష్యత్తులో భూ సంబంధిత సమస్యలను తగ్గించేందుకు అవకాశం ఉంటుందని అధికారులు తెలిపారు. భూమిపై హక్కులకు సంబంధించిన అధికారిక ఆధారం మరింత పటిష్టంగా ఉండేందుకు రీసర్వే వివరాలు ఉపయోగపడతాయని పేర్కొన్నారు.
కార్యక్రమంలో తిరువూరు మండల తహసీల్దార్, రెవెన్యూ అధికారులు, సిబ్బంది పాల్గొన్నారు.
