ఆరోగ్య కేంద్రాల పనితీరును పరిశీలించిన డీఎంహెచ్‌వో రాజా రెడ్డి
నిర్మాణ పనులు, కుష్టు వ్యాధి సర్వే, వైద్య సేవలపై సమీక్ష
వరంగల్ | ఎన్‌ టుడే న్యూస్‌:
ప్రజలకు నాణ్యమైన వైద్య సేవలు అందించాలని జిల్లా వైద్య ఆరోగ్యశాఖ అధికారి డాక్టర్ బి. రాజా రెడ్డి వైద్య సిబ్బందికి సూచించారు. ఆరోగ్య కేంద్రాలకు వచ్చే రోగులకు మెరుగైన సేవలు అందించడంతో పాటు, జాతీయ ఆరోగ్య కార్యక్రమాలను సమర్థవంతంగా అమలు చేయాలని ఆదేశించారు.
ఈ సందర్భంగా తీగరాజుపల్లిలో నిర్మాణంలో ఉన్న ఆయుష్మాన్ ఆరోగ్య మందిరం పనులను డీఎంహెచ్‌వో పరిశీలించారు. నిర్మాణ పనుల పురోగతిని సమీక్షించి, ప్రజలకు మెరుగైన ఆరోగ్య సేవలు అందించేందుకు అవసరమైన ఏర్పాట్లపై దృష్టి సారించారు.
తీగరాజుపల్లిలో నిర్వహిస్తున్న కుష్టు వ్యాధి గుర్తింపు సర్వేను డాక్టర్ రాజా రెడ్డి పర్యవేక్షించారు. వ్యాధి లక్షణాలను ముందుగానే గుర్తించడం, అనుమానిత కేసులను పరీక్షలకు పంపించడం, అవసరమైన వారికి సకాలంలో చికిత్స అందించడం వంటి అంశాలపై సిబ్బంది పనితీరును పరిశీలించారు.
అనంతరం పర్వతగిరి ఆరోగ్య మహిళా క్లినిక్‌, రాయపర్తి ప్రాథమిక ఆరోగ్య కేంద్రం (పీహెచ్‌సీ)లను తనిఖీ చేశారు. వైద్య రికార్డుల నిర్వహణ, ప్రయోగశాల సేవలు, జాతీయ ఆరోగ్య కార్యక్రమాల అమలు తీరును సమీక్షించారు.
వైద్య సేవల్లో నిర్లక్ష్యం లేకుండా ప్రజలకు అవసరమైన పరీక్షలు, చికిత్సలు అందించాలని సిబ్బందికి సూచించారు. ఆరోగ్య కేంద్రాలకు వచ్చే ప్రతి రోగికి సకాలంలో వైద్య సహాయం అందేలా చర్యలు తీసుకోవాలని స్పష్టం చేశారు.
