మహిళా కండక్టర్‌పై దాడిని ఖండిస్తూ నర్సంపేట డిపో ఎదుట కార్మికుల ధర్నా
ప్రవళికకు మెరుగైన వైద్యం అందించాలి.. పూర్తిస్థాయి జీతంతో ఐఓడీ మంజూరు చేయాలి
నర్సంపేట | ఎన్‌ టుడే న్యూస్‌ | అక్టోబర్ 27:
మణుగూరు డిపోకు చెందిన మహిళా కండక్టర్ ప్రవళికపై జరిగిన దాడిని నిరసిస్తూ నర్సంపేట ఆర్టీసీ డిపో కార్మికులు సోమవారం డిపో ఎదుట ధర్నా నిర్వహించారు. ఈ ఘటనను తీవ్రంగా ఖండించిన కార్మికులు, మహిళా ఉద్యోగుల భద్రతకు ప్రభుత్వం తగిన చర్యలు తీసుకోవాలని డిమాండ్ చేశారు.
దాడిలో గాయపడి చికిత్స పొందుతున్న ప్రవళికకు మెరుగైన వైద్య సదుపాయాలు కల్పించాలని, ఆమె పూర్తిగా కోలుకునే వరకు పూర్తిస్థాయి జీతంతో కూడిన ఐఓడీ (ఇన్‌జ్యూరీ ఆన్ డ్యూటీ) సౌకర్యం కల్పించాలని కోరారు. విధి నిర్వహణలో ఉన్న ఉద్యోగులపై దాడులు జరగకుండా కఠిన చర్యలు తీసుకోవాలని అధికారులను కోరారు.
ప్రవళికపై దాడికి పాల్పడిన ప్రయాణికురాలిపై చట్టప్రకారం కఠిన చర్యలు తీసుకోవాలని కార్మికులు డిమాండ్ చేశారు. బాధితురాలికి ఆర్థికంగా అండగా నిలిచేందుకు ప్రభుత్వం తరఫున రూ.20 లక్షల ఎక్స్‌గ్రేషియా ప్రకటించి సహాయం అందించాలని కోరారు.
ఆర్టీసీ ఉద్యోగులు ప్రజలకు సేవలందించే క్రమంలో ఇలాంటి దాడులకు గురికావడం ఆందోళనకరమని పేర్కొన్నారు. మహిళా ఉద్యోగులు భయం లేకుండా విధులు నిర్వహించేలా భద్రతా చర్యలు బలోపేతం చేయాలని ప్రభుత్వాన్ని కోరారు.
ఈ నిరసన కార్యక్రమంలో నర్సంపేట డిపో ఉద్యోగులు నర్సింహులు, సుజాత, రవీందర్ రెడ్డి, చైతన్య, సూపర్‌వైజర్ గోవర్ధన్‌తో పాటు పలువురు కార్మికులు పాల్గొన్నారు. ప్రవళికకు న్యాయం చేయాలని, బాధితురాలికి మెరుగైన వైద్యం, తగిన ఆర్థిక సహాయం అందించాలని వారు డిమాండ్ చేశారు.
