ఆరుట్లలో రూ.50 లక్షలతో డబుల్ సీసీ రోడ్డు పనులు ప్రారంభం

ఎమ్మెల్యే మల్‌రెడ్డి రంగారెడ్డి సహకారంతో అభివృద్ధి పనులకు శ్రీకారం

ఆరుట్ల, నవంబర్ 4 (ఎన్ టుడే న్యూస్): మంచాల మండలం ఆరుట్ల గ్రామంలో రూ.50 లక్షల హెచ్‌ఎండీఏ నిధులతో చేపట్టనున్న డబుల్ సీసీ రోడ్డు నిర్మాణ పనులు ప్రారంభమయ్యాయి. ఇబ్రహీంపట్నం ఎమ్మెల్యే మల్‌రెడ్డి రంగారెడ్డి సహకారంతో ఈ నిధులు మంజూరయ్యాయి.

గ్రామంలోని ఈదమ్మ గుడి నుంచి కంఠమహేశ్వర దేవాలయం వరకు నిర్మించనున్న ఈ రోడ్డు పనులను మంచాల వ్యవసాయ సహకార సంఘం చైర్మన్ వెదిరె హన్మంత్ రెడ్డి, గ్రామ సర్పంచ్ మానిపాటి శోభాకుమార్, మాజీ సర్పంచ్ కొంగర విష్ణువర్ధన్ రెడ్డి కొబ్బరికాయలు కొట్టి ప్రారంభించారు.

పార్టీలకు అతీతంగా గ్రామాల అభివృద్ధి

ఈ సందర్భంగా వెదిరె హన్మంత్ రెడ్డి మాట్లాడుతూ.. గ్రామాల్లో సర్పంచులు ఏ పార్టీకి చెందిన వారైనా అభివృద్ధి కోసం అందరినీ కలుపుకొని పనిచేస్తామని తెలిపారు. ఎమ్మెల్యే మల్‌రెడ్డి రంగారెడ్డి సహకారంతో అన్ని గ్రామాలకు మౌలిక వసతులు కల్పించడమే లక్ష్యంగా ముందుకు సాగుతున్నామని పేర్కొన్నారు.

పార్టీలకు అతీతంగా గ్రామాల అభివృద్ధికి ఎమ్మెల్యే కృషి చేస్తున్నారని, ప్రజల సమస్యలను తెలుసుకునేందుకు గ్రామాల్లో పర్యటిస్తూ అభివృద్ధి పనులకు శ్రీకారం చుడుతున్నారని తెలిపారు.

గ్రామాభివృద్ధికి కృషి చేస్తా: సర్పంచ్

సర్పంచ్ మానిపాటి శోభాకుమార్ మాట్లాడుతూ.. ఆరుట్ల గ్రామ ప్రజల సమస్యలను తెలుసుకొని వాటి పరిష్కారానికి కృషి చేస్తానని చెప్పారు. గ్రామాన్ని అన్ని రంగాల్లో అభివృద్ధి చేయడమే తన లక్ష్యమని పేర్కొన్నారు.

పాల్గొన్న ప్రజాప్రతినిధులు

ఈ కార్యక్రమంలో ఉపసర్పంచ్ నూకం రాజు ముదిరాజ్, ఇబ్రహీంపట్నం మార్కెట్ కమిటీ డైరెక్టర్ సాతిరి ఎల్లేష్, గ్రామపంచాయతీ కార్యదర్శి చిలుకల వెంకటేష్, వార్డు సభ్యులు, ఇందిరమ్మ కమిటీ సభ్యులు, వివిధ పార్టీల నాయకులు, గ్రామ పెద్దలు, ప్రజాప్రతినిధులు, గ్రామస్తులు పాల్గొన్నారు.