పోలింగ్ సిబ్బందికి ఇబ్బందులు తలెత్తకుండా ముందస్తు చర్యలు చేపట్టాలి
ప్రత్యామ్నాయ మార్గాలు, రూట్ మ్యాప్‌లు సిద్ధం చేయాలి.. ఎన్నికల సామగ్రి సక్రమంగా పంపిణీ చేయాలి
గంపలగూడెం, నవంబర్ 4: మురస తుఫాన్ ప్రభావం దృష్ట్యా ఎంపీటీసీ, జెడ్పీటీసీ ఎన్నికల విధుల్లో పాల్గొనే పోలింగ్ సిబ్బందికి ఎలాంటి ఇబ్బందులు కలగకుండా అధికారులు ముందస్తు జాగ్రత్తలు తీసుకోవాలని తిరువూరు రెవెన్యూ డివిజనల్ అధికారి ఏ. కుమార్ ఆదేశించారు. గంపలగూడెం మండలంలోని జెడ్పీ హైస్కూల్‌లో ఏర్పాటు చేసిన పోలింగ్ సామగ్రి పంపిణీ కేంద్రాలను ఆయన పరిశీలించారు. ఈ సందర్భంగా ఎన్నికల ఏర్పాట్లను సమీక్షించి, పోలింగ్ సిబ్బందికి పలు సూచనలు చేశారు. తుఫాన్ ప్రభావంతో భారీ వర్షాలు కురుస్తున్న నేపథ్యంలో కొన్ని ప్రాంతాల్లో రహదారులపై నీరు చేరి వాహనాల రాకపోకలకు అంతరాయం కలిగే అవకాశం ఉందని పేర్కొన్నారు. ఈ పరిస్థితులను ముందుగానే అంచనా వేసి పోలింగ్ సిబ్బంది తమకు కేటాయించిన కేంద్రాలకు సురక్షితంగా చేరుకునేలా పటిష్టమైన ఏర్పాట్లు చేయాలని అధికారులకు సూచించారు. అవసరమైన ప్రాంతాల్లో ప్రత్యామ్నాయ మార్గాలను గుర్తించి, వాటికి సంబంధించిన రూట్ మ్యాప్‌లను ముందుగానే సిద్ధం చేసి సిబ్బందికి అందజేయాలని ఆదేశించారు. పోలింగ్ సిబ్బందికి అవసరమైన ఎన్నికల సామగ్రిని పూర్తిస్థాయిలో తనిఖీ చేసి, ఎలాంటి కొరత లేకుండా సక్రమంగా పంపిణీ చేయాలని ఎన్నికల అధికారి, ఎంపీడీవో, తహసీల్దార్‌లకు స్పష్టం చేశారు. తుఫాన్ పరిస్థితుల్లో ఎన్నికల నిర్వహణకు ఎలాంటి ఆటంకాలు ఎదురుకాకుండా అన్ని శాఖల అధికారులు సమన్వయంతో పనిచేయాలని, సిబ్బంది భద్రతకు అత్యంత ప్రాధాన్యత ఇవ్వాలని ఆర్డీవో ఏ. కుమార్ సూచించా
రు.
