కార్పొరేషన్లలోనూ ఇందిరమ్మ టవర్లు

తొలి విడతలో నాలుగు నగరాల్లో జీ+5 భవనాల నిర్మాణం.. దీపావళిలోగా నోటిఫికేషన్

హైదరాబాద్ (ఎన్ టుడే న్యూస్): రాష్ట్రంలోని హైదరాబాద్ తరహాలోనే ఇతర మున్సిపల్ కార్పొరేషన్ల పరిధిలోనూ జీ+5 అంతస్తులతో ఇందిరమ్మ టవర్లను నిర్మించనున్నట్లు రాష్ట్ర మంత్రి పొంగులేటి శ్రీనివాసరెడ్డి వెల్లడించారు. పట్టణ ప్రాంతాల్లో పేదలకు గృహ వసతి కల్పించే లక్ష్యంతో ఈ కార్యక్రమాన్ని చేపడుతున్నట్లు తెలిపారు.

తొలి విడతలో నాలుగు నగరాల ఎంపిక

తొలి విడతలో వరంగల్, కరీంనగర్, నిజామాబాద్, నల్గొండ మున్సిపల్ కార్పొరేషన్ల పరిధిలో ఇందిరమ్మ టవర్ల నిర్మాణ పనులు చేపట్టనున్నట్లు మంత్రి ప్రకటించారు. ఈ నిర్మాణాలకు సంబంధించి దీపావళిలోగా నోటిఫికేషన్ విడుదల చేయనున్నట్లు వెల్లడించారు.

‘మా ఇందిరమ్మ ఇంట్లో దీపావళి’ వేడుకలు

ఇందిరమ్మ ఇళ్ల లబ్ధిదారులతో దీపావళి వేడుకలను ప్రత్యేకంగా నిర్వహించాలని ప్రభుత్వం భావిస్తున్నట్లు పొంగులేటి శ్రీనివాసరెడ్డి తెలిపారు. ‘మా ఇందిరమ్మ ఇంట్లో దీపావళి’ అనే పేరుతో పండుగ సంబరాలు నిర్వహించాలని సూచించారు.

పేదలకు గృహ వసతి కల్పించడమే లక్ష్యం

పేదల సొంతింటి కలను సాకారం చేయడంతో పాటు పట్టణ ప్రాంతాల్లో గృహ వసతి సమస్యను పరిష్కరించేందుకు ప్రభుత్వం చర్యలు చేపడుతోందని మంత్రి పేర్కొన్నారు. ఇందిరమ్మ టవర్ల నిర్మాణం ద్వారా అర్హులైన పేదలకు నివాస సదుపాయాలు కల్పించడమే లక్ష్యమని వివరించారు.