యూట్యూబ్ వీడియోలు చూసి నకిలీ నోట్ల తయారీ.. రూ.6.78 కోట్ల నకిలీ కరెన్సీ పట్టివేత
కుంట్లూరు కేంద్రంగా తయారీ, పంపిణీకి కుట్ర.. నలుగురు నిందితులను అరెస్ట్ చేసిన ఫ్యూచర్ సిటీ పోలీసులు
హైదరాబాద్: యూట్యూబ్, సోషల్ మీడియా వీడియోలు చూసి నకిలీ నోట్ల తయారీ నేర్చుకున్న ఓ వ్యక్తి, తన సహచరులతో కలిసి భారీ స్థాయిలో నకిలీ కరెన్సీ తయారీ, పంపిణీకి పాల్పడినట్లు పోలీసులు గుర్తించారు. ఈ కేసులో నలుగురు నిందితులను ఫ్యూచర్ సిటీ కమిషనరేట్ పోలీసులు అరెస్ట్ చేశారు. వారి నుంచి మొత్తం రూ.6.78 కోట్ల విలువైన నకిలీ నోట్లను స్వాధీనం చేసుకున్నట్లు వెల్లడించారు.
కుంట్లూరు కేంద్రంగా నకిలీ నోట్ల తయారీ
కుంట్లూరును కేంద్రంగా చేసుకుని నకిలీ నోట్ల తయారీ, పంపిణీకి నిందితులు కుట్ర పన్నినట్లు పోలీసులు తెలిపారు. ప్రధాన నిందితుడు కర్ణాకర్ యూట్యూబ్, సోషల్ మీడియా వీడియోలు చూసి నకిలీ నోట్ల తయారీ విధానాన్ని నేర్చుకున్నట్లు ప్రాథమిక విచారణలో వెల్లడైందని పేర్కొన్నారు.
కారులో వెళ్తుండగా పోలీసుల తనిఖీలు
రామోజీ ఫిల్మ్‌సిటీ సమీపంలో కారులో వెళ్తున్న నిందితులను పోలీసులు తనిఖీ చేశారు. ఈ సందర్భంగా కారులో రూ.8 లక్షల విలువైన నకిలీ నోట్లను గుర్తించి స్వాధీనం చేసుకున్నారు. అనంతరం నిందితుల తయారీ కేంద్రంపై దర్యాప్తు చేపట్టి, పంపిణీకి సిద్ధంగా ఉంచిన మరో రూ.6.78 కోట్ల విలువైన నకిలీ నోట్లను పట్టుకున్నారు.
సంయుక్త ఆపరేషన్‌తో గుట్టురట్టు
అబ్దుల్లాపూర్‌మెట్ పోలీసులు, షాద్‌నగర్ ఎస్‌వోటీ బృందాలు సంయుక్తంగా ఈ ఆపరేషన్ నిర్వహించాయి. కేసుకు సంబంధించిన వివరాలను ఫ్యూచర్ సిటీ పోలీస్ కమిషనర్ తరుణ్ జోషి వెల్లడించారు. నకిలీ కరెన్సీ తయారీ, పంపిణీ వెనుక ఉన్న ఇతర వివరాలపై పోలీసులు దర్యాప్తు కొనసాగిస్తున్నారు.
