వర్షాభావంతో తగ్గిన దిగుబడి.. పెరిగిన డిమాండ్‌

హైదరాబాద్‌, అక్టోబర్‌ 10 (ఎన్‌ టుడే న్యూస్‌):

బతుకమ్మ పండుగ వేళ తెలంగాణలో పూల ధరలు ఆకాశాన్నంటుతున్నాయి. వర్షాభావ పరిస్థితుల కారణంగా పూల దిగుబడి తగ్గడం, పండుగ నేపథ్యంలో డిమాండ్‌ పెరగడంతో ధరలకు రెక్కలొచ్చాయి. గునుగు, తంగేడు, బంతి, చామంతి తదితర పూల ధరలు పెరగడంతో కొనుగోలుదారులపై అదనపు భారం పడుతోంది.

హైదరాబాద్‌లోని గుడిమల్కాపూర్‌ హోల్‌సేల్‌ మార్కెట్‌లో బంతిపూలు కిలో రూ.150 నుంచి రూ.180 వరకు, చామంతి రూ.300 నుంచి రూ.400 వరకు, గులాబీలు రూ.200 నుంచి రూ.250 వరకు పలుకుతున్నాయి.

బతుకమ్మ పండుగలో పూలకు ప్రత్యేక ప్రాధాన్యం ఉండటంతో ధరలు పెరిగినా కొనుగోలు చేయక తప్పడం లేదని మహిళలు చెబుతున్నారు. పండుగకు అవసరమైన పూలను సమకూర్చుకునేందుకు అధిక ధరలు చెల్లించాల్సి వస్తోందని వాపోతున్నారు. పూల ధరలు మరింత పెరుగుతాయేమోనన్న ఆందోళన కూడా కొనుగోలుదారుల్లో వ్యక్తమవుతోంది.