మధిర మండలంలో ఏడు రోడ్లకు రూ.10.50 కోట్ల నిధులు
మడుపల్లి పరిధిలో రహదారుల నిర్మాణానికి ప్రభుత్వ అనుమతులు
గ్రామీణ రవాణా సౌకర్యాల మెరుగుదలకు ప్రాధాన్యం
మధిర: ఖమ్మం జిల్లా మధిర నియోజకవర్గంలో గ్రామీణ రహదారుల అభివృద్ధికి మరో ముందడుగు పడింది. మడుపల్లి పరిధిలో ఏడు రోడ్ల నిర్మాణ పనులకు రూ.10.50 కోట్ల అంచనా వ్యయంతో ప్రభుత్వం పరిపాలనా అనుమతులు మంజూరు చేసింది. ఉప ముఖ్యమంత్రి మల్లు భట్టి విక్రమార్క కృషితో ఈ అనుమతులు లభించాయని మధిర మండల కాంగ్రెస్ పార్టీ అధ్యక్షుడు పారుపల్లి విజయకుమార్, పట్టణ కాంగ్రెస్ అధ్యక్షుడు తలుపుల వెంకటేశ్వర్లు తెలిపారు.
మధిర పట్టణంలోని కాంగ్రెస్ పార్టీ కార్యాలయంలో శనివారం వారు మాట్లాడుతూ నియోజకవర్గ అభివృద్ధికి ఉప ముఖ్యమంత్రి ప్రత్యేక శ్రద్ధ చూపుతున్నారని పేర్కొన్నారు. గ్రామీణ ప్రాంతాల్లో రహదారి సమస్యలను పరిష్కరించడంతో పాటు రైతులు, విద్యార్థులు, ప్రజలకు మెరుగైన రవాణా సౌకర్యాలు కల్పించేందుకు చర్యలు తీసుకుంటున్నారని తెలిపారు.
మడుపల్లి పరిధిలో మంజూరైన ఏడు రోడ్ల వివరాలు:
దేశినేనిపాలెం పంచాయతీరాజ్ రోడ్డు నుంచి కేఎల్ రావు రోడ్డు వరకు బీటీ రోడ్డు నిర్మాణం — 1.1 కి.మీ., రూ.2 కోట్లు.
అల్లినగరం రోడ్డు నుంచి తాళ్లూరు అల్లినగరం రోడ్డు వరకు బీటీ రోడ్డు నిర్మాణం — 2 కి.మీ., రూ.3.75 కోట్లు.
ఎర్రచెరువు నుంచి ఎన్‌ఎస్‌పీ కాలువ వరకు గ్రావెల్ రోడ్డు నిర్మాణం — 1.6 కి.మీ., రూ.90 లక్షలు.
దేశినేనిపాలెం పంచాయతీరాజ్ రోడ్డు నుంచి పొలాల వరకు గ్రావెల్ రోడ్డు నిర్మాణం — 1 కి.మీ., రూ.65 లక్షలు.
అల్లినగరం రోడ్డు నుంచి పొలాల వరకు గ్రావెల్ రోడ్డు నిర్మాణం — 1 కి.మీ., రూ.70 లక్షలు.
అల్లినగరం రోడ్డు నుంచి మడుపల్లి–తాళ్లూరు రోడ్డు వరకు గ్రావెల్ రోడ్డు నిర్మాణం — 1.8 కి.మీ., రూ.1.50 కోట్లు.
బీసీ కాలనీ నుంచి కేఎల్ రావు రోడ్డు వరకు గ్రావెల్ రోడ్డు నిర్మాణం — 1.7 కి.మీ., రూ.1 కోటి.
ఈ రోడ్ల నిర్మాణం పూర్తయితే గ్రామీణ ప్రాంతాల్లో రవాణా సౌకర్యాలు మెరుగుపడటంతో పాటు వ్యవసాయ ఉత్పత్తుల రవాణాకు, రైతుల ప్రయాణాలకు, స్థానిక ప్రజల రోజువారీ రాకపోకలకు ప్రయోజనం చేకూరుతుందని నాయకులు తెలిపారు. గ్రామీణ ప్రాంతాల్లో మౌలిక సదుపాయాల అభివృద్ధికి ప్రభుత్వం ప్రాధాన్యత ఇస్తోందని పేర్కొన్నారు.
మధిర నియోజకవర్గాన్ని అన్ని రంగాల్లో అభివృద్ధి చేసేందుకు కృషి చేస్తున్న ఉప ముఖ్యమంత్రి మల్లు భట్టి విక్రమార్కకు ఈ సందర్భంగా వారు కృతజ్ఞతలు తెలిపారు.
ఈ కార్యక్రమంలో మధిర మున్సిపల్ చైర్మన్ సామినేని సుజాత, వైస్ చైర్మన్ కోనాధని కుమార్, కాంగ్రెస్ పార్టీ జిల్లా నాయకుడు వేమిరెడ్డి శ్రీనివాస్ రెడ్డి, కౌన్సిలర్ శీలం నర్సిరెడ్డి, కాంగ్రెస్ నాయకులు రంగా శీను, సామినేని రామనాథం, మోదుగు బాబు, తన్నీరు రామకృష్ణ, జాకీర్ హుస్సేన్ తదితరులు పాల్గొన్నారు.
