ట్రేడింగ్ పేరుతో గచ్చిబౌలి కానిస్టేబుల్‌కు టోకరా.. రూ.29.20 లక్షలు స్వాహా
ఫేస్‌బుక్‌లో పరిచయం.. వాట్సాప్‌లో మాటలు.. నకిలీ లాభాలు చూపించి వల
హైదరాబాద్, నవంబర్ 4 (ఎన్ టుడే న్యూస్): సైబర్ మోసగాళ్లు సామాన్యులతో పాటు పోలీసు సిబ్బందినీ లక్ష్యంగా చేసుకుంటున్నారు. గచ్చిబౌలి పోలీస్ స్టేషన్‌లో పనిచేస్తున్న ఓ కానిస్టేబుల్‌ను ట్రేడింగ్‌లో పెట్టుబడుల పేరుతో మోసం చేసి రూ.29.20 లక్షలు కాజేసిన ఘటన వెలుగులోకి వచ్చింది.
ఫేస్‌బుక్ పరిచయంతో వల
బాధిత కానిస్టేబుల్‌కు ఫేస్‌బుక్‌లో ‘సుకన్య రెడ్డి’ పేరుతో ఓ మహిళ నుంచి ఫ్రెండ్ రిక్వెస్ట్ వచ్చింది. దానిని అంగీకరించిన తర్వాత వాట్సాప్‌లో పరిచయం పెంచుకున్నట్లు సమాచారం. అనంతరం ట్రేడింగ్‌లో పెట్టుబడులు పెడితే అధిక లాభాలు వస్తాయని ఆమె నమ్మించింది.
చిన్న పెట్టుబడితో నకిలీ లాభాలు
‘డార్విన్ ఎక్స్ గ్లోబల్’ అనే సంస్థలో మొదట చిన్న మొత్తంలో పెట్టుబడి పెట్టగా లాభాలు వచ్చినట్లు చూపించారు. దీంతో నిజంగానే లాభాలు వస్తున్నాయని నమ్మిన కానిస్టేబుల్ విడతలవారీగా మొత్తం రూ.29.20 లక్షలు పెట్టుబడి పెట్టాడు.
రూ.76 లక్షల లాభం పేరుతో మరో డిమాండ్
కానిస్టేబుల్ ఖాతాలో రూ.76 లక్షల లాభం వచ్చినట్లు చూపించిన మోసగాళ్లు, ఆ మొత్తాన్ని విత్‌డ్రా చేసుకోవాలంటే రూ.12 లక్షల ఫీజు చెల్లించాలని డిమాండ్ చేశారు. దీంతో అనుమానం వచ్చిన బాధితుడు తాను మోసపోయినట్లు గుర్తించి సైబర్ క్రైమ్ పోలీసులకు ఫిర్యాదు చేశాడు.
పెట్టుబడుల పేరుతో అప్రమత్తంగా ఉండాలి
సోషల్ మీడియా ద్వారా పరిచయమయ్యే వ్యక్తులు అధిక లాభాల ఆశ చూపిస్తూ పెట్టుబడులు పెట్టమంటే అప్రమత్తంగా ఉండాలి. లాభాల ఉపసంహరణకు ముందస్తు ఫీజులు, పన్నులు లేదా ఇతర ఛార్జీల పేరుతో డబ్బులు అడిగితే జాగ్రత్త వహించాలని సైబర్ భద్రతా నిపుణులు సూచిస్తున్నారు.
