కాంగ్రెస్ కార్యకర్తలకే ఇళ్లు, గేదెలు.. ఓట్లేసిన పేదలకు అన్యాయం

అర్హులను పక్కనపెట్టి రాజకీయ సిఫార్సులకే ప్రాధాన్యమిస్తున్నారని ఆరోపణ

మధిరలో తహసీల్దార్ కార్యాలయం ఎదుట వ్యవసాయ కార్మిక సంఘం ఆందోళన

మధిర: ప్రభుత్వ పథకాల అమలులో రాజకీయ వివక్షకు తావులేకుండా నిజమైన అర్హులకు న్యాయం చేయాలని అఖిల భారత వ్యవసాయ కార్మిక సంఘం (AIAWU) కేంద్ర కమిటీ సభ్యుడు పొన్నం వెంకటేశ్వరరావు డిమాండ్ చేశారు. తెలంగాణ వ్యవసాయ కార్మిక సంఘం మధిర మండల, పట్టణ కమిటీల ఆధ్వర్యంలో శుక్రవారం స్థానిక తహసీల్దార్ కార్యాలయం ఎదుట ఆందోళన నిర్వహించారు. అనంతరం పేదల సమస్యలను పరిష్కరించాలని కోరుతూ అధికారులకు వినతిపత్రం అందజేశారు.

ఈ సందర్భంగా పొన్నం వెంకటేశ్వరరావు మాట్లాడుతూ గ్రామాల్లో సొంత ఇళ్లు లేక అనేకమంది పేదలు తీవ్ర ఇబ్బందులు పడుతున్నారని, ప్రభుత్వం మంజూరు చేస్తున్న పరిమిత సంఖ్యలోని ఇళ్లను కూడా రాజకీయ ప్రాధాన్యాల ఆధారంగా కేటాయిస్తున్నారనే ఆరోపణలు ఉన్నాయని పేర్కొన్నారు. కాంగ్రెస్ పార్టీ కార్యకర్తలకు ప్రాధాన్యమిస్తూ నిజమైన అర్హులను పక్కనపెడుతున్నారని విమర్శించారు. ఇప్పటికే పక్కా ఇళ్లు ఉన్నవారికి కూడా రాజకీయ పలుకుబడితో ప్రభుత్వ గృహాలు దక్కుతున్నాయని, కొందరు ఒకటి కంటే ఎక్కువ ఇళ్ల ప్రయోజనాలను పొందుతున్నారనే ఆరోపణలు ఉన్నాయని తెలిపారు. మరికొందరు గ్రామాల్లో నివాసం లేని తమ బంధువులకు ఇళ్లు కేటాయించేలా ప్రయత్నిస్తున్నారని ఆరోపించారు. గృహాల కేటాయింపులో పారదర్శకత పాటించి, అర్హుల జాబితాను బహిరంగంగా ప్రకటించాలని డిమాండ్ చేశారు.

గేదెల పంపిణీలోనూ రాజకీయ సిఫార్సులకే ప్రాధాన్యమా?

మహిళలకు ఆర్థిక స్వావలంబన కల్పిస్తామనే హామీలతో ప్రారంభించిన ఇందిరా డెయిరీ కార్యక్రమం ఆశించిన ఫలితాలను అందించడం లేదని పొన్నం వెంకటేశ్వరరావు విమర్శించారు. డ్వాక్రా మహిళల నుంచి డబ్బులు సేకరించి గేదెలు పంపిణీ చేస్తామని, మహిళలను ఆర్థికంగా బలోపేతం చేస్తామని చెప్పినప్పటికీ చాలాకాలంగా ఎదురుచూస్తున్న మహిళలకు ప్రయోజనం చేకూరడం లేదని అన్నారు.

గేదెల పంపిణీ సమయంలోనూ అర్హతలను పక్కనపెట్టి కాంగ్రెస్ పార్టీ కార్యకర్తలు సూచించిన వారికే ప్రాధాన్యం ఇచ్చే ప్రయత్నాలు జరుగుతున్నాయని ఆరోపించారు. పేద మహిళలకు జీవనోపాధి కల్పించాల్సిన పథకాలను రాజకీయ ప్రయోజనాలకు ఉపయోగించుకోవడం సరికాదన్నారు. ప్రభుత్వ పథకాల ద్వారా లబ్ధి పొందాల్సిన వారు రాజకీయ సిఫార్సుల కోసం ఎదురుచూడాల్సిన పరిస్థితి ఏర్పడకూడదని పేర్కొన్నారు.

అధికారులకు స్వతంత్ర నిర్ణయాధికారం కల్పించాలి

ప్రభుత్వ పథకాల అమలులో సంబంధిత అధికారులకు స్వతంత్రంగా నిర్ణయాలు తీసుకునే అవకాశం లేకుండా చేస్తున్నారని పొన్నం వెంకటేశ్వరరావు ఆరోపించారు. అధికారులు కేవలం ఆదేశాలను అమలు చేసే వారిగా మిగిలిపోకూడదని, అర్హతలను పరిశీలించి నిబంధనల ప్రకారం లబ్ధిదారులను ఎంపిక చేయాలని సూచించారు.

ప్రజల ఓట్లతో ఎన్నికైన సర్పంచులను సైతం గ్రామాల్లో ప్రభుత్వ పథకాల అమలులో భాగస్వాములను చేయకుండా నిర్ణయాలు తీసుకోవడం ప్రజాస్వామ్య స్ఫూర్తికి విరుద్ధమని అన్నారు. గ్రామస్థాయిలో లబ్ధిదారుల ఎంపిక పారదర్శకంగా జరగాలని, రాజకీయాలకు అతీతంగా పేదలకు న్యాయం చేయాలని డిమాండ్ చేశారు.

ఇళ్లు, గేదెల పంపిణీలో రాజకీయ వివక్షకు తావులేకుండా చర్యలు తీసుకోవాలని ప్రభుత్వాన్ని కోరారు. అధికారులు, పాలకులు తమ వైఖరిని మార్చుకోకపోతే తెలంగాణ వ్యవసాయ కార్మిక సంఘం ఆధ్వర్యంలో పేదలను సమీకరించి పెద్ద ఎత్తున ఆందోళనలు నిర్వహిస్తామని హెచ్చరించారు.

ఆందోళనలో పాల్గొన్న నాయకులు

ఈ కార్యక్రమంలో వ్యవసాయ కార్మిక సంఘం జిల్లా సహాయ కార్యదర్శి మందా సైదులు, సీఐటీయూ జిల్లా ఉపాధ్యక్షుడు శీలం నరసింహారావు, పట్టణ కన్వీనర్ పడకంటి మురళి, తేలప్రోలు రాధాకృష్ణ, మల్లారం మాజీ సర్పంచ్ ఉపేంద్రరావు, సంఘం అధ్యక్ష, కార్యదర్శులు అంగడాల అమరయ్య, షేక్ ఉద్దండ సాహెబ్, నాయుడు శ్రీరాములు, యువజన సంఘం నాయకులు షేక్ సైదులు, వడ్రానపు మధు, దొంతి వీరాచారి, మహిళా సంఘం నాయకులు చేయగుండి వెంకాయమ్మ, ఈశ్వరమ్మ, అంకె శివయ్య, ఎం.డి. ఈసూప్, తేజ్‌వత్ నాగేశ్వరరావు తదితరులు పాల్గొన్నారు.